22 июня 2013 г.
РФ Президенчĕ Владимир Путин Олимп комитечĕн представителĕсемпе тĕл пулсан спортăн уйрăм тĕсĕсене аталантарма, вĕсене Олимпиада дисциплинисен йышне кĕртме сĕннĕ. Утă уйăхĕнче Хусанта иртекен Пĕтĕм тĕнчери Универсиадăн программине пуçласа наци кĕрешĕвне кĕртни те çĕр-шыв ертỹçин сăмахĕпе тỹр килнĕ. Çавăнпа ăмăртусене ирттермешкĕн спортсменсене кăна мар, арбитрсемпе судьясене те хатĕрлеме тытăннă.
Йĕркелỹ комитетĕнчен пĕлтернĕ тăрăх, çур çулта 1400 ытла çын ятарлă семинарсенче вĕренсе квалификацие ỹстерĕ. Тĕнче ăмăртăвĕнче пурĕ 2361 арбитрпа судья ĕçлĕ, вĕсенчен 814-шĕ - тĕрлĕ çĕр-шывран. Универсиадăна хутшăнма ирĕк паракан сертификата Чăваш Ен тренерĕсем те тивĕçнĕ. Вĕсем - наци кĕрешĕвĕн регионсен хушшинчи федерацийĕн ертỹçи Виталий Васильев тата Патăрьел районĕнчи Фарид Чабатов тренер. Универсиадăра пирĕн ентешсем спортсменсен кĕрешĕвне хаклĕç.
"Хыпар" хаçатран.
Источник: "Авангард" (газета Батыревского района)