24 октября 2018 г.
Шкул тесенех кашни çынчи малтан хăйĕн вĕрентекенне аса илет. Чăн та, учитель ĕçĕ чи хисеплĕ те чыслă, пархатарлă та сумлă. Çав вăхăтрах йывăр та яваплă.
Миçе мăшăр куçăна сăнать,вăл мĕн каланине тăнлать,пурнăççулне тĕрĕс суйлама вĕрентет…
П а т ă р ь е л р а й о н ĕ н ч и Çĕньялта учительсен династийĕ Емельян Нестеровран пуçланнă. Емельян Васильевич 1938 çулта шкултан вĕренсе тухнă та Патăрьелĕнчи педагогика училищинче пĕлÿ илнĕ.
Ялти 7 çул вĕренмелли шкулта кĕçĕн классене, каярахпа математика вĕрентнĕ, чылай çул шкул директорĕнче вăй хунă.
Педагогикăри ĕç стажĕ — 40 çула яхăн. Вăл — Ленин орденĕн кавалерĕ. Унăн икĕ хĕрĕ те вĕрентекен профессине суйланă: Зинаида Емельяновна кĕçĕн класри ачасене вĕрентнĕ, Первомайски районĕнчи /халĕ Патăрьел/вĕрентÿ пайĕн заведующийĕпулнă. Раиса Емельяновна та кĕçĕн классене пĕлÿ панă. Вăл общество ĕçне те хастар хутшăннă. Нестеровсен пĕтĕмĕшлеĕç стажĕ — 100 çул ытла.
Çак вăхăтра Çĕньял шкулне учительсем Тутарстанран та килсе тĕпленнĕ: Елена Петровнăпа Василий Сергеевич Антоновсем шкула çĕнĕ варкăш илсе килнĕ. Вĕсен сакăр ачинчен улттăшĕ педагог профессине суйланă. Ытларахăшĕ математика, черчени-рисовани, кĕçĕн класс учителĕсем. Ку йăхра Чăваш Республикин тава тивĕçлĕ вĕрентекенĕсем — иккĕ, РФ Халăха вĕрентес ĕç отличникĕсем— 5, ыттисем те çĕршывăн тĕрлĕ наградине тивĕçнĕ. Халĕ шкулсенче Антоновсен виççĕмĕш пусăмĕ çитĕнекен ăрăва пĕлÿ парать. Пĕртăван Антоновсен мăшăрĕсем те чылайăшĕн —вĕрентекенсем. Вĕсен педагогикăри ĕç стажĕ 600 çултан та иртнĕ.
Клавдия Федоровна Павлова Чĕмпĕрти чăваш шкулĕнче вĕреннĕ. Ялти шкулта пуçламăш класри ачасене пĕлÿ панă. Унăн хĕрĕ Нина Николаевна Карлинова мĕн ĕмĕрĕпех Анат Тăрмăш шкулĕнче чăваш чĕлхи вĕрентнĕ. Кинĕ Вера Матвеевна та учитель пулнă.
Пĕр çемьери çынсем педагог профессине суйласа илнисем пирĕн ялта татах пур: Мария Матвеевна, Алексей Матвеевич, Нина Матвеевна Дмитриевсем. Мария Матвеевна Мускаври шкулсенче тата профессипе техника училищинче математика вĕрентнĕ. Ĕç стажĕ — 43 çул.
Нина Матвеевна та математик,педагогика институчĕ хыççăн Çĕньял шкулĕнче 37 çул ĕçлесе тивĕçлĕ канăва тухнă, РФ Халăха вĕрентес ĕç отличникĕ.
Галина Григорьевна тата Людмила Григорьевна Петровăсем те математиксем: Нăрваш Шăхаль тата Шупашкар шкулĕсенче 35-40-шер çул ĕçленĕ,халĕ тивĕçлĕ канура.
Митрофановсен виçĕ хĕрĕ те педагогсем. Любовь Петровна паянхи кун та Патăрьелĕнчи 2-мĕш вăтам шкулта математика вĕрентет. Шкулта ĕçлеме пуçлани кĕçех 30 çул çитет. Вера Петровнăн ĕç кĕнеки Çĕньялти вăтам шкулта çырăннă, каярахпа Чĕмпĕр облаçĕнчи Вышки ялĕнче малалла тăсăлнă. Вăл паян та унти ачасене физика вĕрентет. Ирина Петровна Муркаш районĕнчи Çатракасси шкулĕнче биолог пулса ĕçлет. Унсăр пуçне директорăн вĕрентÿпе воспитании енĕпе ĕçлекен çумĕ.
Çапла, вĕрентекенсем ăруран ăрăва ырă çимĕç акаççĕ, çамрăксене пĕлÿпе воспитани параççĕ.
Мария МАДЮКОВА
Источник: "Хресчен сасси"