05 октября 2018 г.
Эс атте пек мана туйăнатăн,
Эс анне пек мана ачашлан...
Шкул çулĕсене аса илсен кашни çын чи малтан хăйĕн вĕрентекенне куç умне кăларать. Чăнах та, учитель ĕçĕ чи хисеплĕ те чыслă, пархатарлă та сумлă. Çав вăхăтрах йывăр та яваплă. Миçе куç ăна сăнать, миçе кун вăл мĕн каланине тăнлать, пурнăç çулне тĕрĕс суйлама тăрăшать...
Çĕньялта учительсен династийĕ Е. В. Нестеровран пуçланса кайнă. Емельян Васильевич 1938 çулта шкултан вĕренсе тухнă та Патăрьелĕнчи педагогика училищинче пĕлỹ илнĕ. Ялти 7 çул вĕренмелли шкулта кĕçĕн классене, каярахпа математика вĕрентнĕ, чылай çул директор пулса ĕçленĕ. Педагогикăри ĕç стажĕ 40 çула яхăн. Ленин орденĕн кавалерĕ вăл. Ашшĕ çулĕпе унăн икĕ хĕрĕ те учитель профессине суйласа илнĕ: Зинаида Емельяновна кĕçĕн классене вĕрентнĕ, вĕрентỹ пайĕ Первомайскинче чухне унăн заведующийĕ пулнă. Раиса Емельяновна та кĕçĕн классене вĕрентнĕ. Ялти активистка, обществăлла ĕçре те хастарскер. Нестеровсен династийĕн пĕтĕмĕшле ĕç стажĕ 100 çул ытла.
Çак вăхăтра Çĕньял шкулне Тутарстанран тата çĕнĕ учительсем килсе тĕпленеççĕ. Елена Петровнăпа Василий Сергеевич Антоновсем шкула çĕнĕ варкăш илсе килеççĕ. Антоновсен сакăр ачинчен улттăшĕ педагог профессине суйласа илнĕ, ытларахăшĕ - математиксем, черчени-рисовани, кĕçĕн класс учителĕсем... Ку йăхра Чăваш Республикин тава тивĕçлĕ учителĕсем - иккĕ, Халăха вĕрентес ĕç отличникĕсем - 5, ыттисем те çĕршывăн тĕрлĕ наградине тивĕçнĕ. Халĕ шкулсенче Антоновсен виççĕмĕш пусăмĕ çитĕнекен ăрăва пĕлỹ парать, виççĕмĕш ăру шкул директорĕнче вăй хурать. Пĕр тăван Антоновсен мăшăрĕсем те чылайăшĕн вĕрентекенсем. Вĕсен педагогикăри ĕç стажĕ 600 çултан та иртсе кайнă.
Клавдия Федоровна Павлова Чĕмпĕрти И. Я. Яковлев шкулĕнче вĕреннĕ. Ялти шкулта пуçламăш класс ачисене пĕлỹ панă. Унăн хĕрĕ Нина Николаевна Карлинова Анат Тăрмăш шкулĕнче чăваш чĕлхине вĕрентнĕ. Кинĕ Вера Матвеевна кĕçĕн классен учителĕ пулнă.
Пĕр çемьери çынсем педагог профессине суйласа илнисем пирĕн ялта татах пур: Мария Матвеевна, Алексей Матвеевич, Нина Матвеевна Дмитриевсем. Мария Матвеевна Мускаври шкулсенче тата професси училищинче математика вĕрентнĕ, ĕç стажĕ 43 çул. Нина Матвеевна та математик, пединститут хыççăн Çĕньял шкулĕнче 37 çул ĕçлесе тивĕçлĕ канăва тухнă, Халăха вĕрентес ĕç отличникĕ.
Галина Григорьевна тата Людмила Григорьевна Петровасем те математиксем: Нăрваш Шăхаль тата Шупашкар шкулĕсенче 35-40-шер çул ĕçленĕ, халĕ тивĕçлĕ канура.
Митрофановсен виçĕ хĕрĕ те педагогсем. Любовь Петровна паянхи кун та Патăрьелĕнчи 2-мĕш вăтам шкулта математика вĕрентет, ĕçлеме пуçлани кĕçех 30 çул çитет. Вера Петровнăн ĕç кĕнеки Çĕньялти вăтам шкулта çырăннă, каярахпа Чĕмпĕр облаçĕнчи Вышки ялĕнче малалла тăсăлнă, паян та унта ачасене физикăпа пĕлỹ пама тăрăшать. Ирина Петровна Муркаш районĕнчи Çатракасси шкулĕнче биолог пулса ĕçлет, директорăн вĕренỹпе воспитани енĕпе ĕçлекен çумĕ.
Çапла, ăруран ăрăва ырă çимĕç акаççĕ, çамрăк йыша пĕлỹпе воспитани параççĕ çĕр çинчи чи хисеплĕ профессие суйласа илнĕ, ачасемшĕн иккĕмĕш анне, иккĕмĕш атте вырăнĕнче пулакан вĕрентекенсем.
М. МАДЮКОВА
Источник: "Авангард" (газета Батыревского района)