26 июня 2018 г.
Çĕньялта пурăнакансемшĕн ку çул уйрăмах асра юлĕ. Çимĕк уявĕччен вĕсем ял масарĕн картине тĕпрен юсама пуçларĕç: укçи-тенкине те килсерен пухрĕç, вăй хума та кар! тăрса тухрĕç. Кĕске вăхăтра арçынсен ушкăнĕ икĕ ене профнастилпа тытрĕ. Ку ĕç малалла пырать, никам та айккинче юлас темест. Çак пархатарлă пуçару В. Макаров, В. Ухварин депутатсем пуçарнипе, тăрăшнипе тата ертсе пынипе пурнăçланса пырать. Çавăн пекех Б. Елимов депутат, М. Вазюков, В. Нестеров трактористсем, А. Сергеев водитель, П. Захаров, Ю. Дмитриев сварщиксем питĕ нумай тăрăшрĕç.
Халĕ пирĕн çывăх çыннăмăрсем ĕмĕрлĕхе канлĕх тупнă вырăнта таса та тирпейлĕ, хăтлă та хитре.
Тепĕр пысăк пулăм çинчен те асăнма кăмăллă: çак кунсенче ял халăхĕ каллех нимене тухрĕ. 30 çул юхăнса выртнă кивĕ шкул территорине тасатса- тикĕслесе кану паркĕ тăвас ĕмĕт тытнă çĕньялсем. Кун каçа ватăлса-хăрса кайнă йывăçсене А. Елимов, В. Илларионов моторлă пăчăкăсемпе, хунавсене В. Ухварин, С. Тямин касрĕç. П. Захаров тракторпа çулсене тикĕслерĕ. Отпуска килнĕ Рудольф Макаровпа Василий Дмитриев студент та хастар ĕçлерĕç. Хĕрарăмсемпе шкул ачисем çапăсене пĕр çĕре купаларĕç, шкул кỹлли йĕри-таврашĕнчи çỹп-çап куписене тасатрĕç. Пĕр шутласан тĕлĕнмелле те: çут çанталăкпа киленсе çỹремелли вырăнсене хамăрах тĕрлĕ ăпăр-тапăр пăрахатпăр-çке! Никам та курман чухне ирсĕрлеме юрать теççĕ-ши?
П. Митрофанов тата В. Антонов аксакалсем çамрăксен пуçарăвне ырларĕç, тăван тавралăх илемĕ паянхи çынсене çеç мар, килес ăрусемшĕн те савăнăç кỹрессе шанса каларĕç. 60 çын кунĕпе ĕçленĕ хыççăн уçланкă самаях хитреленчĕ. Килес çул ял уявне çак вырăнта ирттерес шухăшлă çĕньялсем, апла пулсан кунта тата темиçе ниме те пулĕ-ха...
М. МАДЮКОВА. Çĕньял
Источник: "Авангард" (газета Батыревского района)