08 декабря 2017 г.
Чăн сăмахăн суйи çук. Çĕньялта паянхи кун та ĕлĕкхиллех улах лараççĕ: пĕрле пуçтарăнса çăм арлаççĕ, çыхаççĕ, тĕрлеççĕ, вĕтĕ шăрçапа пир татăкĕ çине тĕрлĕрен эреш тăваççĕ... Анчах та кукамай-асаннесем евĕр пĕр-пĕр килте мар, юсав хыççăн капăрланса чиперленнĕ ял клубне пуçтарăнаççĕ. Асаннесемпе кукамайсем йĕркеленĕ "Ăстапи" кружока çỹрекенсем паянхи кун кашниех мастер-класс кăтартма та хатĕр. Хăйсен ĕçĕсенче чăн ăста! Вĕсене ертсе тата хавхалантарса пыраканĕ - О. Мадюкова. Ольга Петровнăн ку тĕлĕшпе опычĕ пахучĕпех. Хĕрарăм тухья-хушпу нумай ăсталать. Çывăх вăхăтра вара вăл ĕçтешĕсене хутран карçинкка авма хăнăхтарасшăн. Мĕнрен япăх улах ларни? Малашне çакнашкал кружок-улаха çамрăк кинсене явăçтарсан та аван.
Источник: "Авангард" (газета Батыревского района)