22 июля 2015 г.
Раççей Президенчĕ Владимир Путин федераллă пухăва янă посланинче "2015 çул _ чĕре чирĕсемпе кĕрешмелли çул" тенĕ. Çакна шута илсе июлĕн 8-мĕшĕнче Çĕньял ял тăрăхĕнче пысăк мероприяти йĕркеленĕ. Унта А. Кольцов врач, медпункт специалисчĕсем, Турхан тата Çĕньял шкулĕсен волонтерĕсем, район администраци çумĕнче йĕркеленĕ Çамрăксен правительствин тата депутатсен Пухăвĕ çумĕнчи Çамрăксен парламенчĕн, райадминистрацин вĕрентỹ пайĕнчи Çамрăксен совечĕн членĕсем, çавăн пекех ял тăрăхĕнчи халăх хутшăнчĕ.
Чи малтанах Анатолий Кольцов врач чĕре чирĕсем çинчен, вĕсенчен мĕнле майпа сыхланмалли, сипленмели çинчен лекци вуласа пачĕ. Чир паллисем палăрсанах больницăна каймаллине пĕлтерчĕ, ăна шала кайма май памалла маррине тепĕр хут ăнлантарчĕ.
Килнĕ халăх юн пусăмне тĕрĕслеттерме, ЭКГ тухма тата юнри сахăр шайне çакăнтах пĕлме пултарчĕ. Çак мероприяти вăхăтĕнче 23 çыннăн юн пусăмĕ пысăкки, 2 çыннăн сахăр шайĕ нормăран ытларах пулни палăрчĕ. Çавăн пекех 18 çын кашни кун эмелпе юн пусăмне кирлĕ шайра тытса тăнине пĕлтерчĕ. Вĕсем пурте çакăнтах малаллахи сиплев пирки врачпа канашлама пултарчĕç. Килнĕ халăха волонтерсем флешмобпа савăнтарчĕç, "Чĕре сывлăхлă пултăр!" ятлă буклет (авторĕ вĕрентỹ пайĕнчи Çамрăксен совечĕн членĕ Т. Илюткина) валеçсе пачĕç. Пуçтарăннисене "Çырласем тата сиплĕ курăк чейĕсем" ятлă пĕчĕк кĕнеке те интереслĕ пулчĕ. Ку брошюрăра шăпах чĕре чирĕсене мĕнле курăксемпе сиплеме май пурри çинчен çырса кăтартнă.
Мероприяти усăллă кăна мар савăнăçлă та пултăр тесе А. Антонова, Ю. Езюков, Р. Семенова пурне те çирĕп сывлăх, телей тата юрату сунса юрă-ташă парнелерĕç.
Н. НИКИТИНА
Источник: "Авангард" (газета Батыревского района)