18 апреля 2015 г.
"Ял çыннишĕн кану кунĕ çук, _ тет Çĕньялти ветеринари участокĕн ертỹçи Г. Лаврентьев. Чăнах та, Георгий Аверкиевича уявсенче те ĕçре курма пулать. Именкассинченех çỹреме тивнĕрен ирхине-ирех тăрса Çĕньяла васкать.
Г. Лаврентьев Украинăри ял хуçалăх академийĕнчен вĕренсе тухнă. Çавăнтанпах вăл _ 34 çул _ выльăхсене чир-чĕртен сиплет. Пĕлỹ илнĕ çĕршыври пĕр хуçалăхра стаж пухма пуçланă, анчах ăна тăван тăрăх хăй патнелле туртнă.
"Герой" колхоз председателĕ Ф. Медведев чĕннипе çуралнă кĕтесе таврăнать. Хуçалăхра тĕп зоотехникра вăй хума пуçлать. "Герой" колхоз темиçе пая уйрăлнă хыççăн "Новая сила" хуçалăхра тăрăшать Г. Лаврентьев. Ун хыççăн 9 çул Пикшикри ветеринари участокĕнче ĕçленĕ.
Çĕньял ял тăрăхĕ виçĕ яла пĕрлештерет. Пуринче те выльăх-чĕрлĕх йышлă тытаççĕ: Çĕньялта _ 230 пуç, Çăл Атăкра _ 126, Анат Тăрмăшра _ 76. Георгий Аверкиевич профилактика мероприятийĕсене вăхăтра пурнăçлать. Унччен çак участокра виççĕн вăй хунă, халь вăл пĕччен пур çĕре те ĕлкĕрет.
Лаврентьевсем хăйсем те выльăх йышлă тытаççĕ. Мăшăр икĕ ача çуратса ỹстрернĕ. Асли Шупашкарти ял хуçалăх академийĕнчи инженерипе механика факультетĕнчен вĕренсе тухнă, халь тĕп хулари пĕр организацинче тăрăшать. Кĕçĕнни педагогика университечĕн студенчĕ.
В. МАКАРОВ
Источник: "Авангард" (газета Батыревского района)