13 сентября 2014 г.
Сентябрĕн 10-мĕшĕнче пирĕн районта Геннадий Айхин произведенийĕсене ют чĕлхене куçаракансем Великобританинчен, Швецинчен тата Норвегинчен Питер Франс, Анника Бэкстрем, Микаэль Нюдаль тата Гуннар Вэрнесс пулнă. Делегаци йышĕпе тĕнчипе палăрнă поэтăн йăмăкĕ Ева Лисина тата Айхи фончĕн представителĕсем те килнĕ.
Хаклă хăнасене район администраци пуçлăхĕ Н. Глухов кĕтсе илнĕ. Николай Иванович тĕл пулура район пурнăçĕ, çитĕнĕвĕ пирки кĕскен каласа панă. Çавăн пекех Геннадий Айхипе курнăçнă вăхăтсене аса илнĕ. Поэт хăйĕн кĕнекисене парнеленине те палăртнă.
Питер Франс _ Британи академийĕн тата Эдинбургри Король обществин членĕ, Митта Ваçлей премийĕн лауреачĕ. 1991 çулта Г. Айхи пухса хатĕрленĕ "Чăваш поэзийĕн антологине" акăлчанла куçарнă.
Антологине шведла куçарнă тепĕр пултаруллă çын _ Уппсале университечĕн (Швеци) филологи факультечĕн хисеплĕ докторĕ Анника Бэкстрем.
Халиччен Геннадий Айхин вырăсла çырнă сăввисене 50 ытла чĕлхене куçарнă. Нумаях пулмасть чăвашла сăввисене куçарас юхăм тапраннă. Швеци поэчĕ, критикĕ, куçаруçи Микаэль Нюдаль сĕннипе поэтăн 6 сăввине акăлчанла (Питер Франс), норвегилле (Гуннар Вэрнес) куçарнă. Тăватă чĕлхепе (çỹлерех асăннă икĕ чĕлхесĕр пуçне тата чăвашла, шведла) янăракан хайлавсене кĕнекен пичетлесе кăларнă.
Е. Лисина пиччĕшне, унăн пултарулăхне сума сăвакансене, хайлавĕсене тĕнчери халăхсене вĕсен тăван чĕлхипе вулама майсем туса паракансене тав тунă.
(Хамăр корр.)
Источник: "Авангард" (газета Батыревского района)