15 декабря 2017 г.
Ватăсем "Ыр çын вилсен, ырă ят юлать", тенĕ. Тепĕр чухне хисеплĕ çыншăн вăл çеç те çителĕксĕр иккен. Хальхинче сăмахăм Тăрăн ялĕнче кăçалхи çĕртме уйăхĕнче 94 çул тултарса пирĕнтен ĕмĕрлĕх уйрăлнă Тăван çĕршывăн аслă вăрçин участникĕ, Раççей МЧСĕн хисеплĕ ветеранĕ Аркадий Никифорович Петров пирки пырĕ. Ветеран 18 çул тултарсанах фронта кайнă. Вăрçăра тăватă хутчен аманнă, Аслă вăрçăн иккĕмĕш степеньлĕ орденне, "За боевые заслуги", "За победу над Германией" медальсене тивĕçнĕ.
Вăрçă хыççăнхи пархатарлă пурнăç çулĕшĕн те пуç таймалăх пур. Республикăри пушар хуралĕнче тĕрлĕ должноçра 30 çул ытла тăрăшнă вăл! Ахальтен мар ĕнтĕ паянхи кун та Раççей МЧСĕн республикăри Тĕп управленийĕн сотрудникĕсемпе ветеранĕсем хăйсен Вĕрентекенне ырăпа çеç аса илеççĕ. Ун ячĕпе тăван ялĕнче Асăну хăми уçасси те ăнсăртран мар. Çак кунсенче ăна ял тата район администрацийĕпе, ял-йышпа, тăванĕсемпе, Патăрьел, Комсомольки тата Шупашкар районĕсен пушар хуралĕн ветеранĕсемпе, чыслă лару-тăрура уçнă.
Источник: "Авангард" (газета Батыревского района)