16 мая 2017 г.
Кĕçĕн Патăрьелĕнчи "Олимп" стадионта Тăрăн ял тăрăхĕн йăлана кĕнĕ футбол турнирĕ иртрĕ. Кăçалхипе вăл 46-мĕш хут пулчĕ.
Хитре лапамра Олег Газмановăн "Россия" юрри чуна хумхантармалла шăранчĕ. Хĕрсех ака-суха ĕçĕсем пыраççĕ пулин те спортăн çак енне кăмăллакансем вылякансене хавхалантарма йышлăн килнĕ. Вăл шутра Патăрьелĕнчи агропромышленность техникумĕнче, пĕрремĕш тата иккĕмĕш вăтам шкулсенче вĕренекенсем те пур.
Вăйă уйне "Мăшăрлисем" тата "Хусахсем" тухрĕç. Пĕрремĕш тайм та, хушса панă вăхăт та никам çĕнтерейменнипе вĕçленчĕ. Пенальти тапсан та шут 3:3пе танлашрĕ. Апла пулсан туслăх çĕнтерчĕ.
"Чи лайăх бомбардир" ята Д. Федоров, "Чи лайăх тапăнса вылякан" _ А. Цветков, "Чи лайăх хỹтĕлевçĕ" _ Д. Илюткин, "Чи лайăх вратарь" Ю. Цветков пулчĕç. Юрий çак ăмăртусене маларах 24 хутчен хутшăнни те кăмăллă.
Н. КРАСНОВ, ăмăрту судйи
Источник: "Авангард" (газета Батыревского района)