05 июля 2016 г.
Шкулсенче сывпуллашу каçĕсем иртнĕ ĕнтĕ. Чечек евĕр ытарми хĕрсемпе улăп евĕр каччăсем алла аттестат илсе пурнăç çулĕ çине тăчĕç. Шăпах 50 çул каялла Патăрьелĕнчи пĕрремĕш вăтам шкулăн 10 г класĕнчен вĕренсе тухнисем те вăхăтĕнче çаплаччĕ. Пурне те çутă малашлăх кĕтетчĕ. Ĕмĕтленнĕ ĕмĕтсем пурнăçланас шанчăкĕ епле пысăкчĕ! Вăхăчĕ çĕмрен пек хăвăрт шуса иртсе кайрĕ. Çур ĕмĕр каялла пĕр класра вĕреннисем тăван шкула пуçтарăнчĕç.
_ 5 класс пĕрле алла аттестат илтĕмĕр эпир ун чухне. Виççĕшĕ (100е яхăн ача) 11 класс хыççăн шкулпа сыв пуллашрĕç. Эпир, вĕренỹ системине çĕнĕлĕх кĕртнĕрен, 10 çул пĕлỹ пухнă, б класра 31-ĕн вĕрентĕмĕр. Пĕр-пĕринпе питĕ çывăхчĕ, туслăччĕ. Чăвашĕ, тутарĕ пуррине пĕрле, çуккине çурмалла туса вĕрентĕмĕр. Асра юлакан çам- рăклăха чиперех ирттертĕмĕр. Аслă вĕренỹ шкулĕсене малалла вĕренме кайма вара пĕртте çăмăл пулмарĕ. Харăсах кашни шкултан миçе ача тухнă та! Икĕ кăларăм пĕрле-çке, _ кăмăллăн аса илет Тăрăнта пурăнакан Анатолий Самакин.
Ун чухне те выпускниксенчен çуррине яхăн аслă пĕлỹ илме пултарнă.
Чылайăшĕ яваплă ĕç вырăнĕсенче вăй хунă. Çиччĕшĕ Шупашкара, ытларахăшĕ районти ялсене, Чĕмпĕр облаçне, Тутарстана... тĕпленнисем пур. Тĕл пулури асамлă самант _ хăшĕн-пĕринпе шăпах 50 çул хыççăн пĕр-пĕрин ытамĕнче пулни...
_ Пурнăçа никам та йĕрсĕр пурăнман, _ тет класс ертỹçи Л. Мулюкова. Вăл кашнийĕшне ятран чĕнет. Хăшĕ кампа пĕр парттăра юнашар ларнине те астăвать. Педагогсен тăрăшуллă ĕçĕ сая кайманнине палăртать.
_ Çаврăнать çав пурнăç урапи. Вăл пуриншĕн те хăналăх çеç. Çавăнпа та туллин пурăнма тăрăшмалла,_ тесе уйрăлчĕç юлашкинчен тĕл пулăва хутшăннисем.
А. АСТРАХАНЦЕВА
Источник: "Авангард" (газета Батыревского района)