18 сентября 2013 г.
Кĕçĕн Патăрьелĕнчи "Исток" агрофирмăн 140 гектарта çитĕннĕ çĕр улми уйĕнче хĕрỹ ĕç шавĕ тăрать. Ушкăнсем çине пайланнă çынсем васкасах "иккĕмĕш çăкăра" пухаççĕ. Тымар çимĕçе пуçтарса кĕртме куллен вăтамран 75 _ 80 çын тухать. Ана вĕçĕнчех туянма килнĕ машинăсем лараççĕ.
Агрофирмăра çак çимĕçе туса илессипе аван ĕçлеççĕ. Лаптăкĕ те унăн районта пысăккисенчен пĕри. Çуркунне ăна минераллă удобренипе хутăштарса, колорадо нăрринчен тата тымар хуртĕнчен имçамласа лартнă. Вăрлăха та çуллен çĕнетсе тăраççĕ. Пĕлтĕр Мускавран _ "романо", Санкт-Петербургран _ "невский", кăçал çĕр-шывăн тĕп хулинчен "рокко" сортсене илсе килнĕ. Пурте вĕсем элита е суперэлита репродукциллĕ.
_ Çĕр улмине ăçта сутасси, вырнаçтарасси пирки те пуç ватмалла мар. Пирĕн çĕр çинче ỹснĕ çимĕçе Мускавран, Чĕмпĕртен, Самартан, Сызраньтен, Хусантан туянма килеççĕ, _ кăмăллăн каласа парать Д. Ерофеев агроном.
Голланди технологипе çитĕнтернĕ "иккĕмĕш çăкăра" хуçалăхра чылай çул вăй хуракан А. Яковлевпа В. Лампасов механизаторсем кăлараççĕ. Хĕрарăмсемпе арçынсен ушкăнĕ çийĕнчех пуçтарса сеткăсене тултараççĕ, тỹрех машинăсем çине тиеççĕ. Хăватлă техника чăваш çĕрĕнче ỹснĕ çĕр улмипе инçе çула тухать.
О. ПАВЛОВА
Источник: "Авангард" (газета Батыревского района)