28 июля 2012 г.
“Алтай крайĕнчи муниципалитет пĕрлĕхĕсен канашĕ” Ассоциацийĕн йыхравĕпе тата “Раççей Федерацийĕнче вырăнти хăйтытăмлăха йĕркелесси çинчен калакан” саккуна пурнăçа кĕртсе пĕр-пĕрин ырă опычĕпе паллашас тĕллевпе июлĕн 21-22-мĕшĕсенче республика делегацийĕ (мĕн пурĕ 36 çын) пулнă.
Ун йышĕнче пирĕн районтан тăватă ял тăрăх пуçлăхĕ – Людмила Юркина (Ишлĕ), Александр Сымов (Турхан), Константин Михеев (Тăрăн), Георгий Фомин (Алманчă) – пулнă. Делегацие республикăри муниципалитет пĕрлĕхĕ-сен Канашĕн председателĕн çумĕ Александр Сироткин, Канашăн ĕç тăвакан директорĕ Станислав Николаев ертсе пынă.
Вырăнти йăла-йĕркепе вĕсене хăйсен чиккинче Ассоциацин ĕç тăвакан директорĕ Владимир Никулин, Тальминский район администрацийĕн пуçлăхĕ Игорь Жарков ăшă кăмăлпа кĕтсе илнĕ, сцена ăстисем юрă-ташăпа савăнтарнă.
Ĕçлĕ тĕл пулу вăхăтĕнче Алтай крайĕн тата Чăваш Республикин муниципалитет пĕрлĕхĕсен Ассоциацийĕсем пĕрле ĕçлес пирки килĕшсе татăлнă. Чăваш çĕр-шывĕнчен кайнă делегаци тĕрлĕ шайри пысăк çынсемпе тĕл пулнă, ĕç опычĕпе паллашнă.
“Алтай крайĕнчи Шукшин кунĕсем” фестивальте, Стростки ялĕнчи Пĕтĕм Раççейри музей-заповедникра пулни, Пикет тăвĕ çинче художествăпа публицистика программине пăхни нумайлăха асра юлĕ. Фестивале Алтай крайĕн кĕпĕрнаттăрĕ Александр Карлин, Раççейри паллă артистсемпе пултарулăх ĕçченĕсем хутшăннă.
Источник: "Авангард" (газета Батыревского района)