Публикации » Халăха – тавар, ял çыннине – ĕç

Треньелĕнчи кирпĕч завочĕн территорийĕнче темиçе çул ĕнтĕ шăплăх хуçаланатчĕ. Тахçан кунта çынсем черет тăрса кирпĕч туяннине ĕненесех те килместчĕ. Халь вара çĕнĕ варкăш кĕнĕ тейĕн: мăлатукпа шакканă, пăчкăпа каснă сасă илтĕнсе çеç тăрать. Кунта тулли мар яваплă “Возрождение” пĕрлешÿ профнастил кăларакан цеха хута ярассишĕн тăрăшать. Шăпах хатĕрленÿ ĕçĕсем пыраççĕ: объектăн шалти ăш-чиккине тирпейлессипе, хăтлăх кĕртессипе тимлеççĕ. Профиллĕ листасен линисене те вырнаçтарма пуçланă. Пурĕ вĕсем виççĕ пулмалла, паяна Раççейре тата Китайра ăсталанă оборудованисене илсе килнĕ. Вĕсем мĕнле ĕçленине тĕрĕслесе пăхнă.

– Шăвăç тĕркемĕсене Липецк тата Череповецк хулисенчи заводсенчен турттаратпĕр. Листасене тĕрлĕ тĕслĕ кăларма палăртнă. Вĕсемпе пÿрт тăррине витме те, карта тытма та пулĕ. Туянакансем тĕсне суйласа илееççĕ, çавăн пекех хăйсене миçе метр кирлине кура кастарттараяççĕ. Ку ĕçе хăвăртрах, тирпейлĕрех пурнăçлама, укçа - тенке перекетлеме май парать. Цеха çитес уйăхра хута ямалла, çавна май заказ паракансем те пур, – пĕлтерет пĕрлешÿ директорĕ В.Галкин цехпа паллаштарса çÿренĕ май.

Район территоринче çакăн пек пĕчĕк предприятисем пурри питĕ аван. Çынсене валли ĕç вырăнĕсем уçăлаççĕ, инçете кайса çÿреме те кирлĕ мар. Профиллĕ листасем кăларакан цех хута кайсан Треньелĕнчи тата ун таврашĕнчи ялсенчи 20е яхăн пурăнакан предприятине вырнаçĕ.