16 июля 2019 г.
ЧĂВАШ Республикин тава тивĕçлĕ экономисчĕн, хисеплĕ краеведăн, "Авангард" хаçатăн çывăх тусĕн, Туçара пурăнакан Валерий Салминăн çемье архивĕ ыттисеннинчен самай аслă та пуян. Çурт çумĕнче йĕркеленĕ музейĕнче унăн пурнăçĕпе кун-çулĕ, творчествăри пултарулăхне çутатакан питĕ нумай шедевр упранать. Автор ял, район историйĕ çинчен çырнипе çеç çырлахмасть, космос тата унăн тытăмĕ пирки те наукăпа тĕпчев ĕçĕсем çырать, çĕнĕрен те çĕнĕ кĕнекесем калăплать. Ахальтен мар юлашки çулсенче çеç вăл Чăваш наци конгресĕн, чăваш нацийĕн наукăпа искусство академийĕн Президенчĕн Хисеп грамотине тивĕçнĕ. Иртнĕ çул Валерий Ивановича халăх умĕнчи тава тивĕçлĕ ĕçшĕн Аркадий Айдак орденне парса чыс турĕç, кăçал вара Питрав кунĕнче халăх академийĕн Президенчĕ Е. Ерагин Чăваш халăх академикĕн знакне кăкăр çумне çакса ячĕ.
Источник: "Авангард" (газета Батыревского района)