29 мая 2018 г.
Ăçтан, мĕнле çитнĕ-ши Юхмапа Пăла тăрăхне çĕнĕ йышши Лютка текен çĕпĕр йĕп вăррийĕ (стрекоза Лютка сибирская)? Хальлĕхе çакă пуриншĕн те ыйту. Ăна пирĕн районти "Присурский" заповедникра курнă. Республикăра та питĕ сайра тĕл пулаканскерне нумай пулмасть çеç асăрханă. Лютка çĕршывĕ анлă иккен. Вăл ытларах Инçет Хĕвелтухăçĕнче, Европăра, Монголинче, Çĕпĕрте, Вăтам Азире, Вăтам Уралта тĕпленнĕ. Йĕп вăрри 40-45 миллиметр тăршшĕ, тĕпрен илсен çутă хăмăр, кăкăрĕпе хырăмĕ тĕлĕнче йăлтăртатакан пăхăр тĕс уйăрса тăрать. Куçĕ сăрă хура, анчах хĕл каçнă хыççăн çуркуннене кăвак тĕспе улшăнать. Малашне экологсемшĕн çак çĕнĕлĕх сăнав та, тĕпчев те пулĕ.
Источник: "Авангард" (газета Батыревского района)