06 апреля 2018 г.
Çак кунсенче Хусанти Лев Толстой ячĕллĕ федераци университечĕн филологипе культура коммуникацийĕн институтĕнче патшалăх чĕлхисен Пĕтĕм Раççейри олимпиадин юлашки этапĕ иртнĕ. Унта чăваш ачисем те хутшăннă. Олимпиадăна 9 - 11 класра вĕренекенсем тăхăр регионтан пухăннă. Урăхла каласан, хăйсен тăван чĕлхине хỹтĕлекенсем сахалăн пулман.
Вĕренекенсене патшалăхăн тĕрлĕ чĕлхин уйрăмлăхне шута илсе чăн малтан эссе çырма сĕннĕ. Конкурс условийĕпе килĕшỹллĕн тăван сăмахпа янăракан сăвăсене вырăсла та куçарнă. Олимпиадăна хутшăннисен çуралнă тăрăха пахалăхлă та ытарлă презентацилеме, наци çи-пуçĕпе паллаштарма пĕлни те пысăк пĕлтерĕшлĕ пулнă. Туçари вăтам шкулта 10 класра вĕренекен (вĕрентекенĕ В. Яковлева) Валерия Николаева çакнашкал условисене жюри членĕсем умĕнче çăмăллăнах парăнтарнă, призерсен йышне кĕнĕ.
Источник: "Авангард" (газета Батыревского района)