19 декабря 2017 г.
Туçари вăтам шкулта юртан тĕрлĕ кĕлетке ăсталас йăла-йĕркене пăрахăçа кăлармаççĕ. Çултан-çулах ăна çĕнетсе, пуянлатса пырасси вара _ тĕп тĕллев. Пĕлỹ çурчĕ умĕнче (декабрĕн 16-мĕшĕнче 176 çул тултарчĕ) хĕл илемĕпе усă курса çулсеренех юртан тĕрлĕрен чĕрчун кỹлепине ăсталасси те хăйне евĕр искусство "шедеврĕ" шутланать. Тăватă ураллă туссен асамлă тĕнчине йĕркелесе ертсе пыраканĕ ИЗО тата технологи предмечĕсене вĕрентекен В. Свинцов тата унăн "пулăшуçă-строительсем". Çак ялсем Вячеслав Германович тăрăшнипе кăçалхипе 17-мĕш хут хĕл тăршшĕпех юртан ăсталанă илемпе киленме çеç мар, ту айккинче ярăнса савăнма та пултараççĕ. Вăл шутра ачасемпе пĕрлех çитĕннисем те.
Сăмах май каласан, Туçасен алă ĕç творчествипе паллашма çулсеренех ытти ялтан та çынсем йышлăн пыраççĕ. Ара, çичĕ хут çынран илтиччен пĕрре хăв куçупа курни мĕне тăрать! Кăмăлăр пулсан, Çĕнĕ çулпа Раштав уявĕсенче эсир те çак асамлăх ытамне лекме пултаратăр.
Источник: "Авангард" (газета Батыревского района)