03 мая 2017 г.
Республикăри наци библиотекинче "Литературăллă Чăваш Ен: 2016 çулхи чи лайăх вуланакан кĕнеке" конкурса пĕтĕмлетрĕç. Вăл шăпах Чăваш чĕлхи кунĕпе пĕр те килчĕ. Çавна май мероприятие писательсем, поэтсем, журналистсем, библиотекарьсем, вулакансем тата ыттисем те йышлăн пухăнчĕç.
Конкурс тĕрлĕ номинаципе иртрĕ. Жюри председателĕ Ю. Артемьев çак тапхăрта авторсем вулакансемпе конференцисем, тĕл пулусем, диспутсем ирттернине те палăртса хăварчĕ.
Конкурса чăвашла тата вырăсла 2016 çулта пичетленсе тухнă 123 кĕнекене кĕртнĕ. Ку енĕпе хăйсен шухăшне палăртнă 38324 вулакан сĕнĕвне те шута илнĕ. Хак пама республикăри районсенчи тата хуласенчи 74 вулавăш хутшăннă.
"Литературăллă Чăваш Ен: 2016 çулхи чи лайăх вуланакан кĕнеке" конкурсра "Хальхи проза" номинацире (чăвашла) Арсений Алексеевич Тарасов çĕнтерỹçĕсен шутне кĕнĕ. Авторăн "Вĕлтĕртетсе вĕçет сарă çулçă" кĕнекине вулакансем вырăна хунă. Саламлатпăр ентеше. Малашне те халăх кăмăлне кайма пултаракан кĕнекесем пичетлеме ăнăçу сунатпăр.
Арсений Тарасов Пăлакасси ялĕнче çуралса ỹснĕ. Халĕ республикăн тĕп хулинче пурăнать.
А. ИВАНОВА
Источник: "Авангард" (газета Батыревского района)