22 февраля 2017 г.
Пурăннă пулсан паян шăп 80 çул тултаратчĕ вăл.
И. Арланов 1937 çулхи февралĕн 22-мĕшĕнче Кивĕ Ахпỹрт ялĕнче кун çути курнă. Хăйĕн пурнăçне вăл çуралнă тăрăхпа, çĕрпе çыхăнтарнă. Иван Николаевич мĕн пĕчĕкренех колхозра вăй хунă. 1955 çулта "Гвардеец" хуçалăхра бригадирта тăрăшма пуçланă. Каярах вара вăл Кивĕ Ахпỹртри клуб заведующийĕнче, Туçа ял совечĕн председателĕнче, колхозри партком секретарĕнче, хуçалăх ертỹçи çумĕнче, "Южный" сысна комплексĕн директорĕнче ĕçленĕ. 1985 çулта И. Арланова республикипе кĕрлесе тăнă "Гвардеец" колхоза ертсе пыма шанаççĕ. Хуçалăх "тилхепине" вăл 1997 çулчченех тытать.
Ĕçне кура хисепĕ. Иван Николаевич "ЧАССР ял хуçалăх тава тивĕçлĕ ĕçченĕ", "Халăх çутĕç отличникĕ" хисепсене, Ĕçлĕх Хĕрлĕ Ялав орденне, медальсене тивĕçнĕ. ЧАССР Аслă Канашĕн депутатне те темиçе хутчен суйланнă.
Ырă çын вилет _ ырă ят юлать, теççĕ.
И. Арланов пирĕнпе юнашар çук пулсан та унăн ячĕ, ĕçĕ халăх чĕринче упранĕ.
Хамăр корр.
Источник: "Авангард" (газета Батыревского района)