08 июля 2016 г.
Туçари почта уйрăмĕнче иртен пуçласа каçченех çын: пĕрисем электричествăпа, газпа, телефонпа усă курнăшăн татăлаççĕ, теприсем хаçат-журнал туянанаççĕ, лотерея выляттарас шутлисем те пур, пахча-çимĕçсене хуртран сапмалли препаратсем туянаççĕ тата ытти те. Миçе тĕрлĕ ĕç тумалла харăсах. Пурне те ĕлкĕрет О. Телегина ертỹçĕ. Çак системăра Ольга Васильевна 37 çул ĕçлет.
_ Тивĕçе чыслăн пурнăçласа пыма почтальонкăсем те пулăшаççĕ. Г. Телегинан, Г. Уткинан, Г. Виноградован та ĕç стажĕ- сем пысăк. Р. Каргина та аслисенчен юласшăн мар. Хул урлă почтальонка сумкине çакса вĕсем вăтăршар çул ытла утаççĕ. Çумăр çуни те, çил тăманĕ те хăратмасть харсăрсене. Унчченрех хаçат-хурнал ытларах çырăнатчĕç. Халĕ вара почта уйрăмĕ пĕр-пĕр лавкканах çаврăнчĕ. Пенси панă кунсенче сумки-сумккипе тавар илсе кайса сутаççĕ, _ тет пĕр сăмахран ăнланакан тантăшĕсем пирки О. Телегина. Пĕри те çамрăк мар вĕсем. Тивĕçлĕ канăва тухни те, унта утăмлаканни те пур. Çавăнпа ĕçе çамрăксене те явăçтарма тăрăшаççĕ. Козловка-Пăлакассине акă çĕнĕ хыпарсене илсе çитерекен тивĕçлĕ канăва тухнă хыççăн Н. Рубцова ĕçе малалла тăсать. Почта уйрăмне 1100 хаçат-журнал килсе тăрать. Вĕсенчен 290-шĕ _ районта тухса тăракан "Авангард" (38 процента яхăн). Çулсерен ăна пĕр сиктермесĕр вулакансен йышĕ хушăнсах пырать. Юрий Викторовичпа Василий Романович Мулюков сем, Н. Думилина тата ыттисем те темиçе тĕрлĕ хаçат-журнал çырăнса илеççĕ.
Умри тĕллевĕсене чыслăн пурнăçлама тăрăшаççĕ почта ĕçченĕсем. Вĕсен тивĕçĕ хаçат-журнал салатасси, таварсем сутасси çеç мар-çке. Халăхпа пĕр чĕлхе тупасси малта тăрать. Ахальтен мар куç пек кĕтеççĕ вĕсене. Тивĕçлĕ канурисем вара пушшех те. Вĕсемех электроэнергипе, газпа усă курнăшăн татăлассине те почтальонкăсем урлă туса пыма тăрăшаççĕ.
А. АСТРАХАНЦЕВА
Источник: "Авангард" (газета Батыревского района)