23 июня 2016 г.
Шупашкарти "Новое время" пичет издательствинче çак кунсенче пирĕн ентешĕн _ Вăтаелĕнче çуралса ỹссе çĕр çине ырă йĕр хăварнă Н. Плечовăн _ "Пурнăç уттипе" ятпа сăвăсен пуххи пичетленсе тухнă. Ăна кун çути кăтартассине унăн хĕрĕ _ Альбина Иванова (Плечова) хăй çине илнĕ. Алла илсе кăмăлтан вуламалли ĕçе Николай Алексеевич çуралнăранпа 101 çул çитнине халалланă. Çакна палăртма та кăмăллă: Н. Плечова вилнĕ хыççăн Чăваш Республикинчи писательсен союзĕн членне илнĕ.
Кĕнеке 300е яхăн страницăран тăрать. Вăл 100 экземплярпа пичетленнĕ. Автор сăввисемсĕр пуçне унта Альбина Николаевна пултарулăхĕ те палăрать. Кĕнекене ăрăва малалла тăсакан хăйех пичете хатĕрленĕ тата редакциленĕ.
Паянхи кун çакнашкал историе кĕрсе юлакан пичет продукцине хатĕрлеме пултарни тем пекех паха. Николай Алексеевич ачисем çеç мар, ял та мăнаçланма пултарать çакăнпа. Сăмах май çакна та палăртма кăмăллă: пурăннă чухне Н. Плечов хаçатăн çывăх тусĕ пулнă. Кĕрлесе тăракан "Гвардеец" колхоз, унти ĕçчен халăх çинчен тăтăшах статьясем çырнă.
Çĕнĕ кĕнеке библиотекăсене çитрĕ. Ăна вулакансем алла илессе шанас килет.
А. АСТРАХАНЦЕВА
Источник: "Авангард" (газета Батыревского района)