18 февраля 2016 г.
Николай Архипович Кипятков 1944 çулхи ноябрĕн 5-мĕшĕнче Архип Алексеевич Алексеевпа Анна Степановна çемйинче Туçа ялĕнче кун çути курнă. Çăмăлах килмен пурнăçĕ. Пĕчĕккĕллех аслисене хуçалăхра пулăш пултăр тесе тантăшĕсемпе колхозра ĕçленĕ. 5 класра чухнех уйра ĕçлекенсем патне шыв турттарнă. Вăл вăхăтра тырра алăпа вырнăран ĕçченсене сĕт парса хавхалантарнă. Ăна та хире Николай Архиповичах илсе кайнă. Çав вăхăтрах фермăна улăм та турттарнă. Пур ĕçре те тăрăшуллă пулнă.
Пушă вăхăтра вара унăн аллинче кĕнеке. Питĕ вулама юратнă каччă. Пуçланă кĕнекене вĕçлес тесе çĕр çывăрман каçсем сахал мар иртнĕ. Ахальтен мар ăна вăл вăхăтра шкулта библиотекарь пулса ĕçлекен Олимпиада Салмина ыттисен умĕнче яланах мухтанă.
Тĕрлĕ сăлтава пула шкулпа 9 класс хыççăн сывпуллашма тивнĕ, ун хыççăн ỹркенмен яш ял хуçалăхĕнчи ĕçсене чунтан тăрăшса пурнăçланă.
"Ача çуралсан хĕрсене качча кайма, арçын ачасене салтака кайма юрăхлă пултăр", _ тесе пиллеççĕ. 1963 çулхине Николай Архиповичăн салтак ячĕ тухать. Пушкăртри Стерлитамак хулине авиаци полкне лекет, машинист-техник пулса тăрать. Германинчи Бранденбург, Пермь облаçĕнчи Березники хулине лекет. 6 çул службăра тăнăскер 1969 çулта тăван яла таврăнать.
1969 çулта ял хĕрĕпе Лидия Ивановна Марковапа çемье çавăраççĕ. 2 ывăлпа пĕр хĕр çуратса ỹстереççĕ. Мĕн тивĕçлĕ канăва кайиччен хуçалăхри ĕне тата сысна фермисенче ĕçлеççĕ. Чунне парса тăрăшнăран вĕсене темĕн чухлĕ Хисеп хучĕпе, парнесемпе хавхалантарнă. Иккĕшĕ те ĕç ветеранĕ.
Кĕçĕн ывăлĕ вăхăтсăр çĕре кĕнĕрен ватăсем халĕ кинĕпе тата мăнукĕпе шăкăлтатса пурăнаççĕ. Ялта тĕпленнĕ аслă ывăлĕпе Сĕнтĕрвăрри хулинче пурăнакан хĕрĕн çемйисене яланах хапăл.
Коля тетен чун киленĕçĕ вара _ кĕнеке. Библиотекăна эрнере икĕ хутчен те çитме пултарать. Халиччен вуланисене те темиçе хутчен шĕкĕлчесе тухнă ĕнтĕ вăл. Сериал хыççăн сериал пăхакан мăшăрне те кĕнеке вулама хистет. "Санăн сериалусем уйăхĕпе тăсăлаççĕ, эпĕ хамăн кĕнекери сăнарăн пурнăçĕ еплерех вĕçленнине туххăмрах пĕлме пултаратăп" _ тет шỹтлесе ветеран.
А. КУЗНЕЦОВА, ял библиотекарĕ
Источник: "Авангард" (газета Батыревского района)