13 марта 2013 г.
Хăй вăхăтĕнче учительте, ял тăрăх пуçлăхĕнче, экономистра тата ытти яваплă вырăнсенче вăй хунă Валерий Салмина Тури Туçара çеç мар, районта та чылайăшĕ çывăх пĕлеççĕ. 68 çула капашнине пăхмасăр юнĕ çамрăк чухнехилле вĕресе тăракан чăваш ĕмĕрĕпе тенĕ пек сывă пурнăç йĕркине çирĕп пăхăнать, спортпа туслă пурăнать, çавăнпах вашават курăнать. Валерий Иванович хальхи вăхăтра та икĕ кунта пĕрре çанталăка пăхмасăр ирпе-ирех уçă сывлăша чупма тухать. Çул çÿревĕ те урам тăршшĕ кăна мар. Паян та вăл 15 çухрăма (Елчĕк районĕнчи Кушкă ялне çити) çăмăллăнах парăнтарать. Çывăх вăхăтра маршрутне тата вăрăмлатасшăн, Аслă Пăла Тимеш ялнех чупса çитесшĕн (кайса-килсе 26 çухрăм). Çĕнĕ дистанцие хăнăхнă хыççăн темиçе çул каяллах кукаçипе асатте пулнă хастар, кăçал Сĕнтĕрвăрринче «Космонавт çулĕпе» ятпа иртекен ăмăртун чи вăрăм инçĕшĕнче (пĕр енне – 21 км) хăйне тĕрĕслесшĕн.
Источник: "Авангард" (газета Батыревского района)