16 декабря 2015 г.
ÇАК кунсенче Пĕтĕм Раççейри инвалидсен обществин республикăри организацийĕ "Пирĕн тавралăхри тĕнче" ("Мир вокруг нас") ятпа сывлăх тĕлĕшĕнчен сусăр çынсен хастар пурнăçне сăнлакан сăн ỹкерчĕксен конкурсне ирттернĕ. Çакнашкал тупăшуран пирĕн район хастарĕсем те айккинче юлман. Ара, кулленхи пурнăçран илнĕ кăсăклă кадрсем çемье архивĕнче сахал упранаççĕ-им? Ку тĕлĕшпе Анат Туçара пурăнакан Георгий Кошкин килти хушма хуçалăхра хăйĕн мăшăрĕпе, Лидия Алексеевнăпа, çитĕнтернĕ выльăх кăшманĕн уйĕнче ỹкерттернĕ фотона ятарлă комиссине тăратнă. Тỹре членĕсем ăнса пулнă ял хуçалăх культурине пахалани куçкĕретех: Георгий Аркадьевичăн ĕçĕ республикăра иккĕмĕш вырăн йышăннă! Кун пирки иккĕленỹ те çуралмалла мар пек, мĕншĕн тесен кил хуçи ытамĕнчи кăшман слон пуçĕнчен пĕрре те пĕчĕк мар-тăр!
Источник: "Авангард" (газета Батыревского района)