26 декабря 2015 г.
Туçари вăтам шкул районта çеç мар, республикăра та çулĕпе чи аслисенчен пĕри шутланать. Ялта 1840 çулхи раштавăн 9-мĕшĕнче халăх училищи уçăлнă. Çакăн пирки çырнă рапорт шăпах шкул историйĕ старт илни паллă. Иккĕмĕш ĕмĕре капашакан тăван шкулăмăрăн пурнăçĕ пуян та тулли. Пирĕн шкултан вĕренсе тухнă выпускниксемпе паян та мăнаçланма пултаратпăр. Вĕсем вуншар çул каяллах ял, район, республика çеç мар, çĕр-шыв чысне çĕклеме пулăшнă. Истори летопиçне çырăнса юлнисенчен вара виçĕ Социализмла Ĕç Геройĕ, икĕ Совет Союзĕн Геройĕ, Раççей тава тивĕçлĕ икĕ учитель, вун пĕр наука докторĕ, хĕрĕхе яхăн кандидат... Туçа хастарĕсемех 380 орден, 600 ытла медаль илме тивĕç пулнă. Унсăр пуçне асăннă шкул коллективĕнченех Тĕнче класлă икĕ спорт мастерĕ тухнă! Вĕрентекенсен мăнаçлăхĕ мар-и-ха çакă!
Иртнĕ шăматкун, декабрĕн 19-мĕшĕнче, Туçари вăтам шкулта ирпе-ирех чуна тыткăнлакан юрăсем пĕрин хыççăн тепри черетленчĕç. Кĕвĕ-çемĕ майĕпе пĕлỹ çуртĕнче вĕрентекенсем çеç мар, вĕренекенсем те вĕлле хурчĕсем пекех хĕвĕшрĕç, сĕрлерĕç... Çакăн валли сăлтавĕ пысăк _ пĕлỹ çурчĕ 175 çул тултарать! Хăнасене хапăл тунă чухнехи ĕçлĕ шав хăпартлантарать çеç.
Сумлă хăнасене шкул ачисемпе вĕрентекенсем ĕлĕкхи ырă йăла-йĕркепе _ çăкăр-тăварпа _ кĕтсе илнĕ хыççăн тĕрлĕ çулта вĕренсе тухнă выпускниксем, хăнасем юбилее хатĕрленсе капăрлатнă акт залне пуçтарăнчĕç. Шăпах çакăнта вара пурте хăйсен кăмăлне ирĕке яма пултарчĕç, тăван шкул утса тухнă кун-çула аса илчĕç, кĕçĕнреххисем аслă вĕрентекенĕсен умĕнче пуç тайрĕç... Залра нумай çул шкул директорĕнче тăрăшса коллектива ăнăçлă ертсе пынă Василий Тестов пулни чылай выпускникшăн хăйне евĕр парне вырăннех пулчĕ-тĕр. Василий Федосеевич тытăнса тăраймарĕ, ĕлĕкхи хастарлăхĕпе илемлĕ юрă шăрантарса ячĕ, ватлăхра чунтан пăчăртанса тухакан сăвă йĕркисене те тăван шкулăмăрах халалларĕ.
Сăмах май каласан, Туçари вăтам шкул коллективĕ паянхи кун та хăйĕн маркине çухатмасть. Ачасене тивĕçлĕ ăс, воспитани паракан 25 педагогран тăххăрăшĕ аслă категориллĕ, улттăшĕ Раççей шайĕнче тава тивĕçлĕ ятсене çĕнсе илнĕ. Шкул тĕрлĕрен конкурс лауреачĕ, инноваци проекчĕсен авторĕ шутланать. 2006 çулта тăван шкулăмăр "Шкул _ ял управçи" номинаципе Раççей Президенчĕн Грантне, унсăр пуçне Мария Табаковапа Леонид Карягин учительсем 100-шер пин çĕнсе илни коллектив паянхи пурнăç уттипе тан пынине тепĕр хут çирĕплетет. Чылай чухне коллективри ăнăçу, çитĕнỹ ертỹçĕрен килет. Ку тĕлĕшпе шкул директорĕн çăмăл мар лавне 2001 çултанпа ăнăçлă туртакан Петр Шашкинăн тивлечĕ пĕчĕк мар. Хастар та правур ертỹçĕ, çаврăнăçуллă директор коллектив малашлăхĕшĕн чунне парса ĕçлет.
Шкулта ырă йăла-йĕркесем пурнăçа кĕрсе пыни те кăмăллă. Паян мĕн пур ачана çанă тавăрса вĕренме хистекен тĕпĕр сăлтав _ вăрçă, педагогика ĕçĕн ветеранĕн М. Гисметдинов ячĕллĕ стипенди. Унăн ывăлĕ, çак шкултан ылтăн медальпе вĕренсе тухнă Г. Гисметдинов пуçарăвĕпе ăна вĕренỹре, общество пурнăçĕнче чи хастар пилĕк вĕренекене параççĕ. Ку таранччен сумми уйăхне 500 тенкĕ пулнă, кăçалтан вара стипенди авторĕ унăн хакне икĕ хут ỹстернĕ. Уяв программи питĕ пуян та тулли содержаниллĕ иртрĕ. Юбилей сцени пĕрре те пушă тăмарĕ: шкул ачисемпе вĕрентекенсем хăйсен творчествипе савăнтарчĕç, аслă вĕрентекенĕмĕрсемпе выпускниксем черетленсе сăмах илчĕç, парнесем пачĕç. Çав хушăрах ĕçре, вĕренỹпе спортра чи хастар та пултаруллă педогогсене, ачасене тĕрлĕ шайри Хисеп грамотипе Тав хучĕсене парса чысларĕç. Туçари вăтам шкулăн сумлă юбилейне район администраци пуçлăхĕ Рудольф Селиванов, район администрацийĕн вĕрентỹ, çамрăксен политики, физкультурăпа спорт управленийĕн начальникĕ Наталия Андреева хутшăнчĕç, пысăк юбилейпе саламларĕç, тивĕçлисене район администрацийĕн тата вĕрентỹ управленийĕн Хисеп грамотисемпе наградăларĕç.
Василий ТЕСТОВ, педагогика ĕçĕн ветеранĕ:
_ Хамăн ĕçĕмре чăн малтан вĕрентỹ базине пуянлатрăм. Ун чухне кабинетсенче çирĕм киноаппаратура, çавăн чухлех телевизор, тележкăллă виçĕ трактор, груз турттаракан виçĕ автомашина, автобус, гусеницăллă пилĕк трактор тата ытти те пулнă. Пĕчĕк колхоз темелле! Коллектив та питĕ туслăччĕ. Çавăнпах ĕнтĕ пирĕн учительсем Раççей шайне çĕкленчĕç. П
етр ШАШКИН, шкул директорĕ:
_ Пирĕн вăтам шкул хамăр тăрăхра чи нумай йышлă пĕлỹ çурчĕсен шутĕнче мар. Кунсерен çичĕ ялтан 156 ача парта хушшине ларать. Апла пулин те эпир районта иртекен олимпиадăсенче те, спорт ăмăртă- вĕсенче те тăтăшах 3-4-мĕш вырăнсене йышăнатпăр. Çакă чăн малтанах ашшĕ- амăшĕ шкул умне пысăк тĕллев лартнинчен те килет тесе шутлатăп. Кашниех хăйĕн ачи мĕн пĕчĕкрен анлă тавракурăмлă, сывлăхлă та патвар çитĕнтĕр тесе тăрăшать-çке.
Альбина ЕГОРОВА
Источник: "Авангард" (газета Батыревского района)