26 сентября 2015 г.
Туçари ял тата шкул библиотекине çỹрекенсем хăйсене çак кунсенче чечек тĕнчине лекнĕнех туйрĕç. Библиотекăра тăрăшакансем "Чи илемлĕ чечек çыххи" конкурс йĕркелерĕç. Пĕринчен тепри хỹхĕм çеçкесем куçа илĕртрĕç. Астра, георгина, салтак тỹмми (ромашка), цини, бархатцы... Пиçен чечекĕ (чертополох) таранах вырăн тупăнчĕ конкурсра.
Тỹресене чи пултаруллă чечек хуçисене суйлама çăмăлах пулмарĕ. Пĕрремĕш вырăна 7 класри Даниель Нягин "Виçĕ паттăр", Ольга Жукова "Ассорти", 3 класри Анна Павлова "Ылтăн хĕвел çаврăнăш", иккĕмĕшне _ 1-мĕшĕнчи Александр Кузнецов "Туслă çемье", 5-мĕшĕнчи Анна Галкина "Эпир пурте тĕрлĕрен, анчах пурте чипер", виççĕмĕшне 8 класри Ирина Глинкина "Туй чечекĕ", 1-мĕшĕнчи София Кузьмина "Виçĕ тантăш", 2 класри Евгений Фешин "Кĕркунне илемĕ" çеçке çыххисемпе тухрĕç. Анжелика Плечова, Александр Мулюков, Викторияпа Валерия Шашкинасем, Наташа Муравьева илсе килнĕ чечексем те чуна тыткăнларĕç.
Çĕнтерỹçĕсене пĕчĕк парнесем парса хавхалантарчĕç.
Куракансене çавăн пекех "Каков он, мир цветов" кĕнеке куравĕ те кăсăклантарчĕ. Унпа вĕсем хаваспах паллашрĕç.
А. КУЗНЕЦОВА.
(Юратнă аппана, Патăрьелĕнче пурăннă Апполинария Каргинана асăнса тата асра тытса)
Источник: "Авангард" (газета Батыревского района)