08 июля 2015 г.
Сĕтел çине тирпейлĕн лартнă кăкшăм тата ун çумне хунă панулмине пăхса ачасем хăйсен умне хунă шурă хут листи çинелле ỹпĕнеççĕ. Парттăсем хушшипе çỹрекен вĕрентекен вĕсене вăл е ку йăнăша тỹрлетме пулăшать. Тĕрĕсех, эпир _ рисовани урокĕнче. Ачасене илем тĕнчине кĕме пулăшаканĕ вара _ Вячеслав Германович Свинцов учитель.
Шупашкар районĕнчи Кукеç поселокĕнче кун çути курнăскерĕн мĕн пĕчĕкренпех аллинче хутпа кăранташ хуçаланнă. Питĕ ỹкерме юратнă вăл. Кукеçри вăтам шкултан вĕренсе тухнă хыççăн пĕр çул Шупашкарти электроаппаратура заводĕнче вăй хунă. Çартан таврăнсан икĕ çула яхăн электрикре тăрăшнă.
И. Я. Яковлев ячĕллĕ педагогика институчĕн хатĕрленỹ уйрăмĕнчен вĕренсе тухнă хыççăн художествăпа графика факультечĕн студенчĕ пулса тăнă.
Вячеслав Германович хăй кăмăллакан ĕçпе пирвайхи утăмсене Шупашкарти 17-мĕш вăтам шкулта технологи учителĕнчен тума пуçланă. Вĕçев моделĕсен кружокне ертсе пынă. Хастар яш тĕрлĕ çул Шупашкарти Ленин районĕнчи, республикăри çамрăк техниксен станцийĕсен ертỹçисенче тăрăшнă. Ỹкерес ăсталăхĕ пысăк пулнă В. Свинцовăн. Ахальтен мар ĕнтĕ ăна Шупашкар районĕнчи Кукеç поселокĕнчи çурт-йĕре, лавккасене илемлетес енĕпе ĕçлекен "Агро" кооператива ертсе пыма шаннă. Ленин районĕнчи 6-мĕш номерлĕ вăтам шкулта исскуство шкулĕн директорĕнче ĕçленĕ вăхăтсене, пĕрле тăрăшнă ĕçтешĕсене ырăпа аса илет вĕрентекен.
Туçари вăтам шкулпа кил хушшинчи сукмака 2002 çултанпа такăрлатма, рисовани тата технологи урокĕсене вĕрентме пуçланă. 2006 çулта çамрăк космонавтсен "Созвездие" отрядне йĕркелесе янă. Ачасем унта пысăк хавхаланупа çỹреççĕ. Уйрăмах С. Свинцов, А. Мулюков, А. Сугутская тăрăшуллă. Отряда çỹрекенсем хăйсен ертỹçипе пĕрле районти, республикăри ăмăртусене час-часах хутшăнаççĕ, çĕнтерỹпе таврăнаççĕ. Кашни çулах чăвашсен пĕрремĕш космонавчĕ А. Г. Николаев çуралнă енре пулаççĕ. Пултаруллăхне кура çак отряда çỹренĕ А.Тюрюхин тỹлевсĕрех Байконура çитсе килме пултарнă. В. Свинцов ертсе пыракан отрядри ачасене республикăри Хисеп хăми çине вырнаçтарнă.
Çак кунсенче Космонавтикăна халалланă "Çăлтăр патне çул хыватпăр" республикăри конкурса хутшăнса хăйсен ỹсĕм çулĕсене тата ăсталăхне кура Э. Викторов, С. Свинцов, В. Маршев, А. Печникова 2-3-мĕш вырăнсене çĕнсе илчĕç.
Вĕрентекенĕн пултарулăхĕ тĕрлĕ енлĕ. Вячеслав Германович шкулта ракета-самолет, кимĕ-карап моделĕсем, хут çĕлен ăсталакансен, ỹкерекенсен кружокĕсене ертсе пырать. Ачасем ăсталанă моделсем шкулта ятарлă кĕтес те тупнă. Çавăн пекех вĕренекенсене йывăçран тĕрлĕ япала касса кăларас ăсталăха та алла илме пулăшать. Аслă класра пĕлỹ пухакансене фото тата видео ỹкерме вĕрентет. Шкулта ачасен ĕçĕсенчен йĕркеленĕ тĕрлĕ вăхăта сăнлакан ỹкерчĕксен, йывăçран касса кăларнă ывăссен, рамăсене вырнаçтарнă типĕтнĕ чечек-курăксен куравĕсем ĕçлеççĕ. Хĕлле вара шкул умне В. Свинцовпа унăн вĕренекенĕсем ăсталанă юр кỹлеписем илем кỹреççĕ: ăш пиллĕ Хĕл Мучийĕ, Юр пикийĕ, вĕсен "пепкисем", тĕрлĕ чĕрчун. Хăвна юмах тĕнчине лекнĕнех туятăн. Ачасен янравлă сассипе тулнă тăвайккийĕ тата мĕне тăрать! Вĕрентекен ачасем мĕн пĕчĕкрен илеме туйма, хăйсем килĕштерекен ĕçе суйлама, тĕрлĕ енлĕн аталанма пултарччăр тесе ырми-канми тăрăшать.
Ĕçри ăнăçу _ килти тăнăçу. Мăшăрĕпе Дианăпа пĕр чĕлхере вĕсем. Хĕрĕ Настя И. Я. Яковлев ячĕллĕ патшалăх педагогика университетĕнче куçăмсăр майпа пĕлỹ пухать. Кĕрỹшĕ Александр Ф. Павлов ячĕллĕ музыка училищинчен вĕренсе тухнăскер Туçари "Сар хĕвел" ача садĕнче музыка руководителĕнче тăрăшать. Çамрăксем питĕ ăста юрлаççĕ, вĕсемсĕр ял тăрăхĕнче пĕр концерт та иртмест. Свинцовсен - икĕ мăнук.
Степан ывăлĕ ашшĕ пекех ỹкерме ăста. Сăн ỹкерес ăсталăхĕ те пысăк. Нумаях пулмасть Пĕтĕм Раççейри "Юность России" конкурсăн республикăра ирттерекен тапхăрĕнче "Серия" тата "Пейзаж" номинацисенче 1-мĕш тата 2-мĕш вырăнсене çĕнсе илме пултарчĕ.
Паянхи кун Туçари вăтам шкулăн акт залне Свинцовсен çем-йин тĕрлĕ вăхăта пахаласа ỹкернĕ сăн ỹкерчĕксен "Туçа ен" выставки илем кỹрет. Ку ĕçе пурнăçлама вĕсем çемйипех кăмăллаççĕ. Кирек ăçта та, кирек хăçан та вĕсен аллинче - фотоаппарат е видеоаппаратура. В. Свинцов "Сам себе режиссер" передачăна та хутшăннă, парнесемпе таврăннă.
А. КУЗНЕЦОВА, ял библиотекарĕ
Источник: "Авангард" (газета Батыревского района)