01 июля 2015 г.
АНАТ Туçара пурăнакан Алексей Астраханцев малтанхи кунхине Чăваш патшалăх педагогика университечĕн физкультура факультетĕнчи патшалăхăн юлашки экзаменне ăнăçлă тытнă хыççăн алла диплом та илсе ĕлкĕреймен, районти çар комиссариачĕ маларах панă повесткăпа пулас салтак тỹрех çул хутаççине хатĕрлеме пуçланă. Ашшĕ-амăшĕпе тăван-пĕтенĕ, тус-юлташĕсемпе пĕлĕшĕсем вара Алексей Геннадьевича ĕлĕкхи йăла-йĕркепех _ салтак юррипе, унăн техĕмлĕ пăттипе, пехил сăмахĕпе _ çула ăсатнă. Шкулта вĕреннĕ чухне те, каярахпа аслă шкулта та спорт каçалăкĕнче ỹсĕм хыççăн ỹсĕм тунă каччă ăсату каçĕнче парăмра юлман: тăван çĕршыва чыслăн та хисеплĕн хỹтĕлесе ят-сумпа таврăнма сăмах панă. Ĕмĕтỹсем çитсе пыччăрах, Алеша!
Сăмах май каласан, Туçа ял тăрăхĕпе çуркуннехи призывра вунпĕр каччăна сĕт çулĕпе кайса çу çулĕпе килме ырă суннă.
Источник: "Авангард" (газета Батыревского района)