06 мая 2015 г.
Ирхи линейкăра вĕренекенсем çак ятпа чăвашла сăвăсем вуларĕç (хатĕрлекенĕ чăваш чĕлхипе литературине вĕрентекен Е. Колпакова), "День Победы" юрра шăрантарчĕç.
Кĕçĕн классене Аслă вăрçăн хăрушă кунĕсем çинчен И. Шакеев, Н. Еллин, Н. Плешков вĕренекенсем каласа пачĕç. Вăтаммисем патĕнче сăвва илемлĕ вулакансен конкурсĕ иртрĕ. Çĕршыв хỹтĕлевçисем çинчен çырнăскерсене ачасем чуна пырса тивмелле кăларчĕç. С. Шакеева, Д. Мыльникова, Н. Плешков чи матуррисем пулчĕç, районти сăвăçсен конкурсне хутшăнма тивĕçрĕç. С. Шакеева иккĕмĕш вырăн йышăнма та пултарчĕ.
Кивĕ Ахпỹрт тĕп шкулĕнчен куçнă Çĕнтерỹ ялавне кĕтсе илни яланлăха асра юлĕ. Вĕренỹ харсăрĕсем хурал тăма тивĕçрĕç. Шкулта чылай çул ĕçленĕ В. Люкин вĕренекенсен умĕнче сăмах каларĕ. Ялав пĕлтерĕшĕ çинчен тепĕр хут ăнлантарса пачĕ.
Историпе вĕрентекен В. Артемьев вăтам классенче Çĕнтерỹ урокне ирттерчĕ. Компьютер технологипе усă курса хаяр вăрçă çинчен тĕплĕн каласа пачĕ.
Кĕçĕн классене вĕрентекенсем вара сăвă вулакансене хатĕрленĕ. Е. Чернова, Д. Суркова, А. Евреев, В. Волков, М. Михеев пултарулăхпа палăрчĕç. Çиччĕмĕшсем çитĕнекен ăрăва шкул музейĕнчи Паттăрлăх кĕтесĕпе паллаштарчĕç. Тăван ял çыннисем çĕнтерĕве мĕнле туптани çинчен тимлĕн итлерĕç пĕчĕк ачасем.
Л. КАЗАКОВА. Çĕнĕ Ахпỹртри тĕп шкул
Источник: "Авангард" (газета Батыревского района)