28 марта 2015 г.
Чун пуянлăхне хăпартас, ăс-хакăлне ỹстерес, культура еткерлĕхне сыхласа упрас ĕçре культура сферинче вăй хуракансем пысăк ĕç тăваççĕ. Çак кунсенче вĕсен професси уявĕ пулчĕ.
Çавна май вĕсем мĕнле ĕмĕт-тĕллевпе пурăннипе кăсăкланас шухăш çуралчĕ. Тутар Тимешĕнчи библиотека пункчĕпе клуб пĕр çуртрах вырнаçнă. Айккинчен пăхсан илĕртỹллĕ ларать вăл. Çынсем пурăнакан çуртсем çывăхра çукран каçхи мероприятисен вăхăтĕнчи кĕвĕ-çемĕ сасси ял халăхне кансĕрлемест. Шалтан та хăтлă кунта. Анчах зал хутăнмасть. Вăхăтĕнче газ кĕртсе хăварайман курăнать. Çулла ăна юсаса çĕнетнĕ. Тепĕр пĕчĕк пỹлĕмре теннис сĕтелĕ пур. Ракеткисем те выртаççĕ. Кану вăхăтне усăллă ирттерме меллех.
Çак кунсенче клуба Тăван çĕршывăн Аслă вăрçинче 1941-1945 çулсенче çĕнтерỹ тунăранпа 70 çул çитнĕ ятпа паракан медальсене илме ветерансемпе тыл хастарĕсене йыхравларĕç.
Хирĕçле вара _ библиотека. Фондра 6800 кĕнеке упранать. Е. Амерханова клуб заведующийĕпе Г. Рахматуллина библиотекарь ытларах пĕрлехи мероприятисем йĕркелеме тăрăшаççĕ. Вĕсене ачасене те, çамрăксене те, аслăраххисене те явăçтараççĕ. Литературăна пĕлмесĕр, калаçу культурине алла илмесĕр ăслă-тăнлă çын пулаймастăнах. Çавăнпа та кĕнеке вулама ачаран хăнăхтараççĕ. Вулавăша тăтăш çỹрекенни вара кĕçĕннисенчен иккĕмĕш класри Л. Амерханова. Аслисенчен _ Р. Салеев пенсионер. Аксакал историлле романсене, вăрçă темипе çырнисене, çемье хутшăнăвĕсене çутатаканнисене ытларах вулама кăмăллать. Туçари вăтам шкулта ĕçлекен Р. Ямалетдинова вĕрентекенпе 11 класри Д. Салеевапа Ф. Фасхутдинова та хăйсене кирлĕ литературăна библиотекăра шыраççĕ. Формулярĕсем чылай хулăн вĕсен.
_ Компьютер техникин ĕмĕ-рĕнче ачасене кĕнекепе туслаштарма çăмăлах мар. Çавна шута илсе тĕрлĕ выставка, конкурс, мероприяти ирттерме тăрăшатпăр,_ тет 1989 çултанпа çак сферăра ĕçлекен Гелсиря Афериновна. Малалла вăл Культура çулталăкĕнчен Литература çулталăкне куçнă май туса пыракан ĕçсемпе паллаштарчĕ. Ача-пăча кĕнекисен эрнинче мĕнле юмахсем вулама палăртнине каларĕ. Аслăрах классене çỹрекенсем хăш-пĕрисене выляса кăтартма та ỹркенмеççĕ. Сăнарсене уçăмлăн кăларнăран кĕçĕннисем вĕсене уйăрса илеççех.
_ Календарьти паллăрах уявсене пĕрне те палăртмасăр хăвармастпăр. Çĕнĕ çулта, Тăван çĕршыва хỹтĕлекенсен, Пĕтĕм тĕнчери хĕрарăмсен, ачалăха хỹтĕлемелли, Ваттисен... кунĕсенче сцена çине ташă-юрă ăстисене кăларатпăр. Музыка аппаратурипе, кĕвĕ çеммипе тивĕçтерекенĕ _ М. Амерханов. Марсел Сагитович хăй те юрлать. Концерт кăтартакан зал хутăнать пулсан Хусантан, ытти çĕртен артистсем килсе çỹреме хирĕçлемеççĕ. Çакă чăрмав кỹрет пире, _ тет Елена Михайловна.
Культура ĕçченĕсен ĕçĕпе влаçри органсем те кăмăллă. Ахальтен Г. Рахматуллина библиотекаре Чăваш Республикин Хисеп грамотине парса чыс туман ĕнтĕ.
Хăйсем те нихăш ĕçе те хирĕçлемеççĕ çав. Ял хуçалăх, халăх çыравĕсене те хутшăнаççĕ. Хуçалăх кĕнекисемпе те çỹреççĕ. Çуркунне çитрĕ. Йĕри-тавралăха çĕрĕн тирпейсĕрлетеççĕ пулсан та куç умне тухакан çỹп-çапа тасатассине хăйсем çинчен сирмеççĕ. Ял уявĕсенче, ял тăрăхĕнчи, районти акатуй-сапантуйсенче сцена çине тухаççĕ. Культура ĕçченĕн культурăлăхĕ çитнине ĕçпе çирĕплетеççĕ.
А. АСТРАХАНЦЕВА
Источник: "Авангард" (газета Батыревского района)