25 февраля 2015 г.
Кивĕ Ахпỹртри культура çуртĕнче "Манăн çамрăклăхри юрăсем" эстрада юрăçисен фестивалĕ иртрĕ. Ăна ял-йыш Ю. Куданова халаллать. Ытла та вăхăтсăр татăлчĕ кун-çулĕ Юрий Александровичăн. Туçари вăтам шкултан вĕренсе тухнă хыççăн вăл Хусанти культура институтне çул тытнă. Алла диплом илнĕ каччă çак сферăра ĕçлесе ăсталăх пухсан Шупашкарти шалти ĕçсен органне куçнă. Полици подполковникне çитнĕччĕ ентешĕмĕр. Хĕрỹ точкăри пĕр командировкăра вара пурнăçĕ вăхăтсăр татăлнă.
Вăхăчĕ шăвать çав малаллах. Сăпайлă та харсăр, кĕрнеклĕ ял çыннине манмаççĕ Кивĕ Ахпỹртсем, çулленех конкурс ирттереççĕ. Унта Юрий мăшăрĕ Пальмира, пĕрле вĕреннĕ, ĕçленĕ тус-юлташĕсем, çывăх çыннисем пухăнаççĕ. Зал кашнийĕнчех тулли пулать.
Кăçал вара фестивале район шайнех кăларчĕç. Çавăнпа та конкурсантсем тата йышлă пулчĕç. Шупашкар тỹрисене вĕсен пултарулăхне хаклама çăмăлах тивмерĕ.
Конкурс виçĕ номинаципе иртрĕ: "Çамрăк талантсем", "Юрă ăстисем", "Профессионал юрăçсем". Уяв каçне иртнĕ çулхи çĕнтерỹçĕ А. Якушкина уçрĕ. Çамрăк талантсенчен вара Кивĕ Ахпỹртри Д. Павлов палăрчĕ. Иккĕмĕшĕнче Аслă Чементи В. Капитонова, ун хыççăн ентеш ялĕнчи А. Кошкина.
"Юрă ăстисем" номинацире пĕрремĕш вырăна Кивĕ Ахпỹртри М. Мальцевапа Кивĕ Катекри В. Николаев тухрĕç. Иккĕмĕш вырăна та иккĕнех тивĕçрĕç: А. Закурдаева (Кивĕ Ахпỹрт), М. Жукова (Кĕçĕн Патăрьел). Виççĕмĕш степеньлĕ лауреатсем Сăкăтри Людмилăпа Вячеслав Нртипе Нăрваш Шăхалĕнчи А. Калькина пулчĕç.
"Профессионаллă юрăçсенчен" Кивĕ Ахпỹртри А. Пузырников мала тухрĕ. Иккĕмĕш вырăнта _ Çĕньялти Ю. Езюковпа Тутар Тимешĕнчи М. Амерханов.
Гран-при премине вара Аслă Чементи М. Латышова çĕнсе илчĕ. Çамрăк юрăçсене ятарлă призсем те парса хавхалантарчĕç. Вĕсем И. Захарована (Патăрьел), Д. Павлова, Ю. Изосимована (Вăтаел) тивĕçрĕç. Уяв пулăшакансемсĕр пулмасть.
Юрăçсене хавхалантаракансене Кивĕ Ахпỹртри культура çурчĕн ĕçченĕсем те тав тăваççĕ.
А. КАПИТОНОВА
Источник: "Авангард" (газета Батыревского района)