11 февраля 2015 г.
Ялсенче граждансен пухăвĕсем иртеççĕ. Нумай пулмасть вăл Анат Туçара пулнă. Унта район администраци пуçлăхĕ Николай Глухов, Туçа ял тăрăх пуçлăхĕ Николай Перепелкин, "Звезда" ял хуçалăх ертỹçи Валерий Кузнецов, ял старости Василий Колпаков, пушар службин, шалти ĕçсен пайĕн представителĕсем хутшăннă.
Пухăва ял кăлави Н. Перепелкин уçнă. Вăл пухăннă çынсене ял тăрăх пурнăçĕпе, экономикипе паллаштарнă. Туçа ял тăрăхĕ районта пысăккисенчен пĕри _ 8 яла пĕрлештерсе тăрать, 3651 çын пурăнать. Пурĕ 7 пин гектар çĕр. Пĕлтĕр бюджета 8 млн та 145,1 пин тенкĕ укçа кĕртме палăртнă, 8 млн 297,1 пин тенкĕ пухăннă. Нухратăн ытларах пайне çул-йĕр юсама усă курнă: нумай хваттерлĕ çуртсем патне пыраканнисене тата тăкăрлăксене тирпейленĕ. Кăçалхи бюджет тупăшпа 8 млн та 560 пин тенкĕпе, тăкакпа 8 млн та 566 пин тенкĕпе, бюджет дефицичĕ 5,8 пин тенкĕпе танлашать.
Туçа ял тăрăхĕнче 6 ял хуçалăх предприятийĕ тата 8 фермер хуçалăхĕ пур. Пĕлтĕр вĕсем аш-какай 103 тонна тата сĕт 1 тонна хатĕрленĕ.
Николай Алексеевич ял тăрăхĕнче нумай функциллĕ центр ăнăçлă ĕçленине, пĕлтĕр Анат Туçари библиотека "пĕр чỹрече" принциппа 92 çынна йышăннине пĕлтернĕ. Çавăн пекех Çамрăксен канашĕн ĕç-хĕлĕпе те паллаштарнă.
Канашлура район администраци пуçлăхĕ Н. Глухов та сăмах илнĕ, кĕскен республика, район пурнăçĕ пирки чарăнса тăнă. Халăх ыйтăвĕсене хуравланă.
Виçĕм кун çакнашкал пуху Ишлĕре иртнĕ. Унăн ĕçне райадминистраци пуçлăхĕн пĕрремĕш çумĕ М. Калмыков хутшăннă.
(Хамăр корр.)
Источник: "Авангард" (газета Батыревского района)