17 января 2015 г.
Ял хуçалăх предприятийĕсемшĕн хĕлле те, çулла та каникул та, отпуск та çук. Хирсем тахçанах шап-шурă юр айне пулнă пулсан та ĕçĕ çителĕклех. Çуркуннехипе е çуллахипе танлаштарсан кăшт сахалрах кăна. Кунсем вăрăмланнă май тырăсене алласа тасатса хумалла, техникăна юсама пуçламалла.
_ Сивĕре пĕрчĕллĕ культурăсене хускатас мар тесе кĕркуннех "Петкус" витĕр кăлартăмăр, акма юрăхлă туса хутăмăр. Кăçал çурхисене 500 гектар никĕсе хывма палăртатпăр. Кĕрхисем вара 160 гектар йышăнаççĕ. Вăрлăх çителĕклĕ. Ăна çулленех çĕнетсе пыма тăрăшатпăр. Пĕлтĕр районти "Малалла" эртелтен ыраш тата "Булинская" агрофирмăран урпа туяннăччĕ. Халь сĕлле пысăк репродукциллипе улăштарасшăн, _ тесе пуçларĕ сăмахне "Тойсинская" агрофирмăна чылай çул ертсе пыракан Г. Рубцов. Сăмах май, иртнĕ çул çанталăк типĕ те шăрăх тăнă пулсан та хуçалăхра тыр-пул тухăçĕ пĕр гектартан вăтамран 20 центнерпа танлашнă. Кăтартусемпе паллашнă май, тĕп агроном Г. Жуков вырма вăхăтĕнче (шăпах çавăн чухне яваплă тапхăр мĕнле пынипе интересленсе хуçалăха çитнĕччĕ. _ авт.) каланă сăмахсем аса килчĕç. "Çĕре витерсе пĕр 3 хут çумăр çунă пулсан та акни-лартни чăшăл! кăна каятчĕ. Çавăнпа та технологине пăхăнса ĕçлени те çителĕксĕр: тырă пĕрчисем вĕтĕ, тухăç хамăр палăртнинчен пĕчĕк те пулĕ", _ тесе пăшăрханса пĕлтерчĕ ун чухнех Геннадий Михайлович.
Туçасем сухан-çевок туса илессипе унчченех палăрнă. Пĕлтĕр сухан вăрлăхне 3 гектар акнă, тухăç вара пĕр гектартан 53 центнер тухнă. Çавăн пекех куккурус _ 20, нумай çул çитĕнекен курăксем _ 197, пĕр çул ỹсекеннисем 70 гектар йышăннă.
Хуçалăх çĕрпе усă курнăшăн патшалăх паракан пулăшăва та илме ти-вĕçнĕ. Кредитсемшĕн паракан субсидисемпе пĕрле кассăна 800 пин тенкĕ кĕнĕ.
Выльăх-чĕрлĕх отрасльне те тимлĕх çите-лĕклĕ уйăрма тăрăшаççĕ. Хуçалăхра шултăра мăйракаллă выльăх 50 пуç, вĕсенчен ĕне _ 40. Паяна сăваканни вара 23, ыттисем _ çывăх вăхăтра пăруламаллисем. Туçасем 2015 çула ăнăçлă пуçланă тесен те юрать: январь пуçламăшĕнчех икĕ пăру хутшăннă. Халь В. Салмина доярка талăкне 210-220 килограмм сĕт сăвать. Шурă шĕвеке Вăрнарти типĕтнĕ сĕт хатĕрлекен завода сутаççĕ. Сергейпе Владимир Галкинсем, Г. Кошкин выльăх айĕсене тасатаççĕ, апат параççĕ. Рациона тăварпа, шурă тăмпа пуянлатаççĕ. Чĕл-хесĕр янаварсене хĕл каçарма 328 тонна сенаж, 4 тонна пусыпка, утă-улăм çителĕклĕ янтăланă. Кăнтăрлахи дежурствăра М. Кудряшова тăрать.
_ Чир-чĕртен профилактика мероприятийĕсене хамах тăватăп. Ĕнесене те искусствăлла майпа йăхтаратăп. Апат тĕлĕшĕнчен йывăрлăх çук. Çанталăк лăпкă, ăшă тăнă чухне выльăхсене кулленех картана уçăлтарма илсе тухатпăр, _ терĕ Д. Алексеева ферма заведующийĕ.
О. ПАВЛОВА
Источник: "Авангард" (газета Батыревского района)