10 декабря 2014 г.
Эпĕ пынă чухне вăл килĕнче кăшт шухăша кайса шахмат фигури ăсталатчĕ. 80 çула çывхарса пырать пулсан та Г. Галкин йывăçран тĕрлĕ япала касса кăларать. Халăхра ун пек çынсем пирки ылтăн алăллă, теççĕ.
Саккăрмĕш теçеткере пыраканăн аса илмелли, иртнĕ кунсене тишкермелли пурах. Ĕмĕр ĕмĕрлесси уй урлă каçасси мар, тесе ахальтен каламан ĕнтĕ. Туçара пурăнакан Геннадий Иванович хурине те, шуррине те çителĕклех курнă. Апла пулсан та унран пурнăç пирки ỹпкелесе калаçнине халĕччен те илтмен.
Г. Галкин нумай ачаллă çемьере ỹснĕ. Ашшĕпе амăшĕ _ Иван Никитичпа (1906 çулта çуралнă) Зоя Александровна (1905) 8 пепке çуратнă, анчах иккĕшĕ вăхăтсăр çĕре кĕнĕ. Ыттисене тивĕçлĕ воспитани парса пурнăç çулĕ çине кăларнă. Йывăр саманана пăхмасăрах, аслă классенче ăс пухнăшăн 150 тенкĕ тỹлеме тивнĕ, вĕрентнĕ. Гена 1954 çулта шкула кĕмĕл медальпе пĕтернĕ. Анчах ашшĕ-амăшне кăштах та пулин пулăшас тĕллевпе Мускава кайнă. Кунта вăл стройкăра тăрăшнă. Сăмах май, "Украина" хăна çуртне тунă çĕре те хутшăннă. Кĕске вăхăтрах монтажникăн 4 разрядне илет. Çулталăкран, алă-ура çавăрсан, Хусанти ветеринари институтне çул тытать. Тĕрĕслĕхе, чăнлăха юратакан каччă юристсем хатĕрлекен уйрăма кĕрес шухăшĕ те пулнă, анчах унта стипенди сахалтараххипе кайман. 1960 çулта аслă шкулăн дипломне аллине илет.
Çамрăк каччă тăван тăрăха каялла таврăнать. Пултаруллă яш Шăнкăртамри ветеринари участокĕн заведующинче ĕçлеме тытăнать. Çулталăкран Патăрьелĕнчи аш-какай тĕрĕслекен станцин заведующи "тилхепине" шанаççĕ. Çакăнтах малалла та тăрăшатчĕ пуль, республикипе кĕрлесе тăнă "Гвардеец" колхозра сыснасем чирлесе йышлă вилнипе çак хуçалăха куçараççĕ. Аслă пĕлỹллĕ специалист амака малалла сарăлма памасть, выльăх йышне упраса хăварма та май килет. Геннадий Иванович колхозра тĕп зоотехник тата ветеринар "ла-вĕсене" туртма пикенет. Хăйне шаннă тивĕçе яланах чунтан пурнăçлать, выльăх-чĕрлĕхе сыватать.
1972 çулчченех кунта тимлет. Шăпах çак тапхăрта "Гвардеец" хуçалăх аш-какай, сĕт-çу туса илессипе çитĕнỹсем тăвать. Пысăк кăтартусемшĕн ĕнтĕ колхоз Ленин орденне тивĕçет. Каярах, 1972-1980 çулсенче, Геннадий Ивановича Туçари ветеринари участокĕн заведущинче вăй хурать. Унтан райком çирĕплетнипе "Гвардеец" хуçалăхра зоотехникра ĕçлет. Çав вăхăтрах колхоз хăй вăйĕпе кăларакан "Гвардеец" хаçатăн редакторĕнче, вырăнти радиоузелăн комментаторĕнче тăрăшать. 1995 çулта вара каллех Туçари ветеринари участокĕн заведующийĕ пулса тăрать. Г. Галкин ăçта тар тăксан та хăйне шаннă тивĕçе тỹрĕ кăмăлпа, чĕре хушнипе тунă. Ахальтен мар ĕнтĕ 1978 çулта "Чăваш Республикин тава тивĕçлĕ зоотехникĕ" ята, Чăваш Республикин Верховнăй Канашĕн грамотине тата ытти наградăсене тивĕçнĕ. Вăл Туçа ял совечĕн тăваттăмĕш созывĕн депутачĕ, Патăрьелĕнчи шалти ĕçсен пайĕн штатра тăман сотрудникĕ, халăх контролĕн тата юлташла судăн членĕ, колхозри спорт комитечĕн председателĕ, уявсене ертсе пыракан пулнă.
1962 çулта Геннадий Иванович мăшăрланнă. Людмила Зосимовнăпа 52 çул килĕштерсе пурăнаççĕ. Вĕсем 3 ача çуратса ỹстернĕ, пурне те аслă пĕлỹ илме пулăшнă. Л. Галкина та ялта хисеплĕ çын. Вăл Туçари вăтам шкулта химипе биологи предмечĕсене вĕрентнĕ.
_ Утса тухнă çулăм такăрах пулмарĕ, анчах иртнĕ кунсемшĕн пĕрре те ỹкĕнместĕп. Çĕр-шыва юрăхлă пултăм, юратнă ĕçре тăрăшрăм, _ тет хисеплĕ ветеринар.
А. ФРОЛОВ
Источник: "Авангард" (газета Батыревского района)