06 декабря 2014 г.
Туçа ял тăрăхне кĕрекен Кивĕ Ахпỹртри Культура центрĕнче йĕркеленĕ шоу-конкурс чăнласах та "çăлтăрсем" хамăр хушăрах пулнине тепĕр хут çирĕплетнĕ.
Сцена çинче _ культура ĕçченĕсем. Хальхинче вĕсен пултарулăхне тỹре таврашĕсемсĕр пуçне залри лăк тулли халăх та хак панă, конкурса хутшăнакан хастарсен кашни номер хыççăн тăвăллăн алă çупнă. Культура ĕçченĕсен пур енлĕ ăсталăхне ултă енĕпе пахаланă. Урăхла каласан, вĕсен чăн-чăн амăшĕ пулса юрлама-ташлама çеç мар, хăйсене тытма та, рекламăлама та, тутлă апат пĕçерме те пĕлмелле. Çак тĕллевсене вара кашниех туллин, кăмăлтан пурнăçланă. Ахальтен мар ĕнтĕ ял тăрăх пуçлăхĕ Н. Перепелкинпа культура учрежденийĕн директорĕ Л. Сеприханова пĕтĕмлетỹ сăмахĕнче мероприятие çỹллĕ шайра, кăтартуллă йĕркеленине тата ирттернине, культура ĕçченĕсем ыттисемшĕн ырă тĕслĕх пулнине палăртса хăварнă.
Конкурсăн чи кĕтнĕ саманчĕ _ тỹре хăйĕн ĕçне пĕтĕмлетни. Пĕр шухăш патне тухса тупăшăва хаклакансем "2014 çулхи чи лайăх культура ĕçченĕ" ята ачасемпе тата çамрăксемпе ĕçлекен методист Ираида Козлова тивĕçнине пĕлтернĕ. Ытти чиперккесем те тĕрлĕрен номинацие тивĕçнĕ: Туçа ял библиотекарĕ А. Кузнецова куракансен кăмăлне тивĕçтернĕ, Кивĕ Ахпỹртри А. Капитонова библиотекарь творчествăлла пултарулăхĕпе уйрăлса тăнă, Вăтаелĕнчи Н. Яковлева артистлăхĕпе, Пăлакассинчи М. Михайлова кĕвĕ-çемĕне ухата пулнипе,Тутар Тимешĕнчи Е. Амерханова çыпăçулăхĕпе, Анат Туçари В. Перепелкина килĕшỹллĕ пулнипе палăртнă.
Мероприятие "Пике" ташă ушкăнĕпе уйрăм юрăçсем тата ытларах пуянлатнă.
Хамăр корр.
Источник: "Авангард" (газета Батыревского района)