22 ноября 2014 г.
РЕСПУБЛИКА тĕп хулинче Пĕтĕм Раççейри спорт форумĕ кĕрлесе иртсе кайнă хыççăн Туçа чăвашĕ, хастар ĕç ветеранĕ В. Салмин унăн участникĕ пулнă май, çавăн чухнех хăй умне пысăк тĕллев лартнă: вăрăм инçĕшне чупассипе "рекорда" çĕнетмелле! Сăмаха каланă та пурнăçланă! Пĕр уйăх ытла ирсерен тренировкăсенче пиçĕхнĕ хыççăн Валерий Иванович иртнĕ эрнере пуçласа тăван ялтан Елчĕк районĕнчи Кавалах çуран чупса çитнĕ, унтан каялла килнĕ. Спорт ветеранĕ ĕнентернĕ тăрăх, çак дистанци шăпах 27 çухрăмпа танлашать-мĕн. Ку таранччен вара вăл 25 çухрăмпа çеç çырлахнă.
Сăмах май каласан, çамрăксене сывă пурнăç йĕркине пропагандăлакан кукаçипе асаттен тепĕр ырă енне те палăртса хăвармалла. Мĕн çамрăкранах вăл "чун апачĕпе" çунатланса пурăнма хăнăхнă. Хальхи çырăнтару кампанинче те 2700 тенкĕлĕх хаçат-журнал çырăнма ĕлкĕрнĕ. Вăл шутра "Авангард" _ яланхи çемье членĕ. Ăна унăн амăшĕ, 90 çултан иртнĕ Мария Степановна та алăран ямасăр вулать.
Источник: "Авангард" (газета Батыревского района)