Публикации » Вĕрентекене асра тытса

15 ноября 2014 г.

Кивĕ Ахпỹрт тĕп шкулĕнче вĕренекенсем тата ял çамрăкĕсем пушă вăхăта усăллă ирттерме тăрăшаççĕ. Кану кунĕсенче вĕсем шкул спорт залне пуçтарăнаççĕ. Кунтах аслă ăрурисем _ ашшĕсем те пур. Икĕ ушкăна пайланса вара вĕсем волейболла выляççĕ. Пĕринче аслисем, тепринче çамрăксем çĕнтернишĕн пачах та пăшăрханмаççĕ. Ашшĕсен ăсталăхĕ пысăкрах, кĕçĕннисен вара çаврăнăçулăхĕпе вăр-варлăхĕ пур. Урампа урам, каспа кас выляни халиччен темиçе те пулнă-ха. Куçса çỹрекен кубок та пур кунта. Малашне ăмăртусене А. Антипов ячĕпе ирттерме калаçса татăлчĕç. Алексей Николаевич хăй те вăхăтĕнче сахал мар волейболист çитĕнтернĕ. Патăрьелĕнчи ял хуçалăх техникумĕнче (унчченхи професси училищинче) ĕçленĕ вăхăтра ачасене республика шайĕнчи ăмăртусене те илсе тухнă. Хăй пурăннă Наречная урам темиçе хутчен те çĕнтерỹçĕ пулнă. Ку хутĕнче те кубок аялти касра пурăнакансенех тивĕçрĕ. Наставникĕн ятне çỹлте тытрĕç вылякансем.

П. РЫБКИН.

Источник: "Авангард" (газета Батыревского района)