26 июля 2014 г.
"Тойсинская" агрофирмăра пĕрчĕллĕ тата пăрçа йышши культурăсем 505 гектар йышăнаççĕ. 200 гектарта çитĕннĕ кĕрхисем _ 180 гектар ыраш, 20 _ тулă _ пиçсе çитнĕрен çапса тĕшĕлеме пикеннĕ. Ыраш уйĕнче С. Шашкин тата унăн пулăшуçи Д. Руб-цов тытса пыракан "Полесье" комбайн ĕçлет. А. Шашкин автомашинăпа çĕнĕ тухăçа йĕтем çине турттарать.
_ Кăçал та çумăр пирĕн тăрăхра йĕркеллĕ ỹкмерĕ. Çĕре витерсе пĕр 3 хут çунă пулсан та акни-лартни чăшăл! кăна каятчĕ. Кĕрхисем аптăрамаççĕ-ха, анчах çурхисем йĕркеллĕ ỹсеймерĕç. Технологине пăхăнса ĕçлерĕмĕр пулсан та тырă вăррисем вĕтĕрех. Тухăç хамăр палăртнинчен пĕчĕкрех те пулĕ. Анчах çитĕннĕ тыр-пула пухса кĕртмелле, хире хăварма юрамасть, _ пăшăрханса калаçать хуçалăхра чылай çул агрономра тăрăшакан Геннадий Жуков.
Çанталăк лайăххипе усă курса ятарлă бригада хиртен килекен тырра тỹрех алласа тасатать. Сортировка машинине П. Алексеевпа В. Рубцов пăхса тăраççĕ. А. Овечкин йĕтемри ĕçсемшĕн яваплă.
Çĕнĕ тухăçа кĕтсе илме кĕлетсене те чир-чĕртен тата хурт-кăпшанкăран хỹтĕлесе шуратса дезинфекциленĕ.
Çулла симĕс шăрчăк пек савăнса ларма вăхăт çук. Хуçалăхра выльăх апачĕ хатĕрлессипе те çанă тавăрсах вăй хураççĕ. Кăçал 500 тонна сенаж хума палăртнă. Ĕнерхи кун тĕлне 300 тонна яхăн янтăланă. Ешĕл апата Р. Жуковпа Н. Бельдеков таптаççĕ. Утă та çителĕклĕ турттарнă. Ĕнесемпе пăрусем хĕлле выçă тăмĕç.
Хуçалăхра сухан вăрлăхне те кăларса пĕтернĕ. Хĕвел хĕртсе пăхсан тепĕр эрне-эрне çурăран ăна пуçтарса кĕртеççĕ. Ун чухне кунта та ĕç вĕресе çеç тăрĕ.
О. ПАВЛОВА
Источник: "Авангард" (газета Батыревского района)