08 мая 2014 г.
Туçари Мулюковсен çемйине вăхăтĕнче ялта çеç мар, таврара та чылай çын пĕлнĕ. Кил хуçийĕ, Геннадий Федорович, шкул директорĕнче, "Гвардеец" колхоз председателĕнче нумай çул вăй хунă.
Тăван çĕр-шывăн Аслă вăрçин участникĕ, хисеплĕ тавра пĕлỹçĕ хуçалăх, ял историне, уйрăм çынсен кун-çулне тĕпчес ĕçре пысăк ĕç тунă, пилĕк кĕнеке пичетлесе кăларнă. Ку ĕçре унăн мăшăрĕ, чăваш чĕлхипе литература учительници Елена Васильевна пĕрремĕш пулăшаканĕ пулнă.
Вăхăтĕнче Мулюковсем пĕр çемьере икĕ ветеран пурăннă: ашшĕ - Федор Васильевич тата ывăлĕ _ Геннадий Федорович. Хисеплĕ салтаксен ырă ятне, вĕсен пархатарлă та сумлă ĕçне паян ачисем çеç мар, мăнукĕсем, мăнукĕн ачисем упраççĕ. Эсир сăн ỹкерчĕкре куракан пĕчĕк "салтак" _ Егорка _ ветерансемшĕн иккĕмĕш тата виççĕмĕш сыпăкри мăнукĕ пулать. Мăн кукашшĕне тата мăн-мăн кукашшĕне вăл яланах асра тытать.
А. ЕГОРОВА
Источник: "Авангард" (газета Батыревского района)