26 февраля 2014 г.
Чак! чак! тăваççĕ сехет йĕпписем, шав малалла шăваççĕ. Пĕрлех пирĕн кунсене те илсе каяççĕ. Эрне пуçланать кăна _ вĕçленет те. Çапла сисмесĕрех уйăх, çулталăк иртет. Красномайски хĕрĕ В. Щукина Туçа ял тăрăхне ĕçлеме килни те 30 çул иртрĕ. Ĕнер кăна пулнă пек çак самант.
Çемьере чи асли пулнăран Валентина Александровнана "куршанак" ачаллах çыпçăннă. Хăйĕнчен кĕçĕн шăллĕсемпе йăмăкĕсене ашшĕ-амăшĕ ĕçре чухне пăхнă, выльăх патне тухнă. Ỹркенменренех 8 класран вĕренсе тухнă хыççăн фермăна вăй хума кайнă. Хăйпе пĕр çулти тантăшĕсем ирхине тутлă ыйхăра чухне вăл хĕвелпе пĕрле тăрса ĕнесем сума васканă. 1974 çулта, 9 класран вĕренсе тухнă хыççăн, Алманчăри "Березка" фермăра тăрăшнă.
_ Сыснасен пĕр ушкăнне пăхакан çуккине пĕлтерчĕç. Эпĕ тата ман юлташ хĕрĕ ĕçлеме ки-лĕшрĕмĕр. Кашни кун ирхи 4 сехетре тăрса Алманчăна çуран утаттăмăр. Фермăпа юнашарах общежити пурччĕ. Апла пулин те килех каяттăмăр. Выльăхсемпе ĕçлеме мана мĕн ачаранах килĕшетчĕ, анчах пурнăçа зоотехник профессийĕпе çыхăнтарасси пирки шухăшламан, _ тет пурнăç кĕнекин листисене каялла уçнă май Валентина Александровна.
Вăтам шкулта вĕреннĕ чухне хĕр агроном пулас, тăван уй-хирте тыр-пул акса ỹстерес тĕллевпе пурăннă. Алла аттестат илес чухне ĕмĕтне улăштарнă. Ял хуçалăх академийĕн зооинженери факультетне вĕренме кĕме ыйтса заявлени çырнă. Унтан экзаменсене ăнăçлă тытса студентка пулса тăнă.
Пурнăçри чи лайăх вăхăт куç хупса тенĕ пек иртсе кайнă. Апрель пуçламăшĕнче В. Щукина диплом илет. Вăл вăхăтра пурне те направленипе ĕçлеме янине чылайăшĕ ас тăваççĕ пуль ĕнтĕ. Валентинана та республика тулашне кайма ят тухнă. Анчах шăпа ăна валли урăхла çул хатĕрленĕ-мĕн.
Аслă пĕлỹ илнине çирĕплетекен документпа ашшĕ-амăшĕ патне килнĕ чухне пике "Гвардеец" колхозра селекционер çуккине илтет. Савăнăçне çывăх çыннисемпе пайланă хыççăн тепĕр кунах Туçа тăрăхне çитет. Çамрăка кунта хапăлласах йышăнаççĕ. Апрелĕн 16-мĕшĕнче Валентина пĕрремĕш кун ĕçе тухнă. Хăйне шаннă тивĕçе чун-чĕререн пурнăçланă, пĕлĕвĕпе туллин усă курма тăрăшнă. Çавăнпах ĕнтĕ хуçалăхра пăру илесси те, ĕнесен сĕт антарасси те лайăх пулнă. Районĕпе кĕрлесе тăнă хуçалăх саланнă хыççăн Анат Туçари "Звезда" ял хуçалăх кооперативĕнче зоотехникра тимлеме пуçăннă. Кунта та лайăх енчен кăна палăрать. Хуçалăх выльăх-чĕрлĕх отрасльне аталантарассипе яланах малтисен ретĕнче. 2000 çулта çулталăк пĕтĕмлетĕвĕпе пĕрремĕш степеньлĕ диплом илнĕ. Ытти çулсенче те ака-суха вĕçленĕ хыççăн ирттерекен районти акатуйран Анат Туçасем пушă алăпа таврăнман. Патшалăх та Валентина Александровна ĕçне пысăка хурса хакланă _ Чăваш Республикин Хисеп грамотине тивĕçнĕ.
_ Зоотехник профессине суйласа илнĕшĕн пĕрре те ỹкĕнместĕп. Ĕçе юратнăранах урăх ниçта та кайма шухăшламан. Çакăнтанах тивĕçлĕ канăва тухрăм. Анчах специалист çитменрен хăнăхнă сукмака хамăнах такăрлатма тивет. Опыта парса хăварма çамрăксем çук. Мана çакă питĕ пăшăрхантарать, _ тет В. Щукина.
Калаçса ларнă май вăхăт аванах иртнине те сисмен. Валентина Александровна сехечĕ çине пăхса илчĕ те каçару ыйтсах фермăналла васкарĕ: çамрăк пăрусем мĕн чухлĕ ỹт хушнине виçме палăртнă унта.
О. ПАВЛОВА
Источник: "Авангард" (газета Батыревского района)