12 февраля 2014 г.
Кивĕ Ахпỹртри культура çуртĕнче Ю. Куданова асра тытса "Манăн çамрăклăхри юрăсем" фестиваль иртрĕ. Юрий Александрович çак ялта çуралса ỹснĕ. Ачаранах юрлама, ташлама, тĕрлĕ музыка инструменчĕпе калама юратнă. Хавас кăмăллăскер кирек кампа та пĕр чĕлхе тупма пултарнă. Вăтам шкултан вĕренсе тухнă хыççăн вăл Хусанти культура институтне çул тытнă. Дипломлă çамрăк культура сферинче тĕрлĕ должноçра ĕçленĕ. Каярахпа Кивĕ Ахпỹрт каччи шалти ĕçсен пайне ĕçе вырнаçнă. Çурçĕр Кавказа ĕçлĕ командировкăна кайсан вара пурнăçĕ татăлнă. Ял халăхĕ манмасть ăна. Эстрада юррисен фестивальне ирттерни те çакăнпах çыхăннă. Кăçалхипе çиччĕмĕш хут пулчĕ вăл. Маларахрисенче 80-90 çулсенчи юрăсем шăраннă пулсан, ку хутĕнче Юрий Куданов юррисене юрланине презентациленинчен пуçланчĕ уяв.
Конкурса Туçа ял тăрăхĕнчи хастар юрăçсем йышлăн хутшăнчĕç. Вĕсем пурте хăйсен пултарулăхĕпе тỹресене тата куракан халăха савăнтарчĕç.
"Çамрăк талантсем" номинацие И. Захарова (Туçа), Д. Павлов (Кивĕ Ахпỹрт), К. Козлова (Козловка) тивĕç пулчĕç. Куракансен кăмăлне каякан виçĕ приза Н. Осипова (Туçа), О. Горшкова (Анат Туçа), Л. Фасхутдинова (Тутар Тимеш) тивĕçрĕç. Виççĕмĕш степеньлĕ фестиваль лауреачĕ М. Мальцева, иккĕмĕш _ А. Воробьева, пĕрремĕш _ А. Закурдаева пулчĕç.
Гран-при фестиваль премине Кивĕ Катекри А. Якушкина çĕнсе илчĕ. Настя культура институтĕнче вĕренет, районта тата ял тăрăхĕнче иртекен мероприятисене тăтăш хутшăнать.
Фестивальте çĕнтерỹçĕсене дипломсем тата парнесем пачĕç. Кунта Юрий Куданов çемйин, тăванĕсен тỹпи те пур. Ентеше сума суни, манманни, асра тытни, унăн пултарулăхне ыттисем ăша хывни питĕ савăнтарать.
А. КАПИТОНОВА
Источник: "Авангард" (газета Батыревского района)