08 февраля 2014 г.
Анат Туçари "Звезда" ял хуçалăх кооперативĕнче выльăх-чĕрлĕх отраслĕ аван аталанса пырать. Çакна тĕслĕхсемпе те çирĕплетме пулать. Пĕлтĕр кунта пĕр ĕнерен çулталăкра вăтамран 5530 килограмм сĕт сунă, пăрусен ỹт хушаслăхĕ 760 грампа танлашнă, 100 ĕнерен 95 пăру илнĕ, кĕтĕве çĕнетме 40 пушмак пăру пур. Кăтартусем лайăххи выльăх апачĕн пахалăхĕпе те çыхăннă. Паян пĕр ĕнене _ 6 килограмм утă, 35-силос, 15-жом, 4-пусыпка, 1 килограмм вăрă чусти тивет. Пурне те пĕрле ярса АКМ-9 миксерпа пăтраштарнă хыççăн тин выльăхсем умне хурса тухаççĕ. Апат парассине йăлтах механизациленĕ. Çуркунне çывхарнă май рациона пуянлатас тĕллевпе тата белокпа витамин хутăшĕсем, комбикорм пама палăртаççĕ.
_ Сĕтрен тупăш аван кĕнине шута илсе ĕнесен йышне тата та ỹстерме, 200 пуçа çитерме, палăртнă. Хальхи вăхăтра 438 пуç ĕне-выльăх пур. Вĕсенчен сăваканни _ 160. Тăватă доярка кашни ир ĕçе васкать. Пăрлаттаракан уйрăмра иккĕн вăй хураççĕ, _ тет хуçалăхра чылай çул зоотехникра тăрăшакан В. Щукина.
Фермăра ытти ĕçсене те механизациленĕ. Дояркăсем 2007 çултанпах витре е флягă йăтса нушаланмаççĕ: сунă сĕт пăрăх тăрăх тỹрех холодильнике каять. Тислĕке те транспортерпа кăлараççĕ.
Выльăх-чĕрлĕхе чир-чĕртен сыхлассине те кирлĕ шайра йĕркеленĕ. Профилактика мероприятийĕсене ирттерессине С. Зайцев выльăх тухтăрĕ пурнăçлать. Эмелсем, сиплемелли тата пĕрремĕш пулăшу памалли хатĕрсем çителĕклĕ.
Хуçалăхра йывăрлăхсем те пур-ха, апла пулин те выльăх-чĕрлĕх отрасльне тимлĕх-çителĕклĕ уйăрма тăрăшаççĕ. Акă, çамрăк выльăхсене кăларакан лагерь фермăран инçерехчĕ тата кивелнĕччĕ те ĕнтĕ. Çакна шута илсе кăçал çывăхарах çĕннине тума тĕллев лартнă. Ку ыйтупа вăй хума пуçланă: сырăшсем туяннă, строительство материалĕсем хатĕрлеме тытăннă. Сăмах май, 2012 çулта ĕнесене валли тепĕр çуллахи лагерь хута кайрĕ.
О. ПАВЛОВА
Источник: "Авангард" (газета Батыревского района)