Публикации » Çĕнĕ пĕрлешĕвĕн ĕмĕчĕсем пысăк

Туçари “Молоко Поволжья” пĕрлешĕве июньте кĕрсе тухнăччĕ. Çак кунсенче унта тепре çитсе килме тиврĕ. Вăхăчĕ нумаях та иртмен-ха, анчах çĕнĕлĕхсем тÿрех куçа курăнчĕç: çуртăн сăн-сăпатне чылай хитрелетнĕ, кĕрекен çула вак чул сарнă...

– Майĕпен вăй илсе пыратпăр. Продукци кăларассине ÿстер-тĕмĕр, ассортимента пуянлатрăмăр. Халиччен мĕн тунипе кăна çырлахасшăн мар. Ĕмĕтсем пысăк, – терĕ пĕрлешĕвĕн ĕç тăвакан директорĕ К. Углев кăмăллăн.

“Молоко Поволжья” пĕрлешÿ кăçалхи январьте хута кайрĕ. Малтанласа чылайăшĕ вăл вăй илсе каясса та ĕненмерĕ-тĕр. Анчах кунта йывăрлăхсене çĕнтерме пултарчĕçех. Халĕ предприятинче 40 çын тăрăшать. Сĕтрен 19 тĕрлĕ çимĕç хатĕрлеççĕ: бифилюкс, хăйма, йогурт, турăх... Пирĕн тăрăхра йод çителĕксĕррине шута илсе асăннă хими элеменчĕпе пуянлатнă сĕт, кефир, чăкăт та сутлăхра пур. Патăрьел çĕрĕ çинче кăларакан продукцие Чĕмпĕрте реализацилеççĕ. Шел пулин те, хальлĕхе Туçан паха апатне Юхмапа Пăла тăрăхĕнчи пĕр лавккара та туянма çук. Кÿршĕллĕ регионта вара хапăлласах илеççĕ-мĕн.

– Эпир кăларакан продукци нумай вăхăт хушши упранаймасть, çавна май тата инçетерех вырнаçнă облаçсене ăсатаймастпăр. Çакна шута илсе çывăх вăхăтрах сĕте тата лайăхрах пастерлекен (ультрапастеризованное молоко) лини хута ярасшăн. Сиплĕ шĕвек кун пек чухне 6 уйăх таран пăсăлмасть. Халь эпир Хусанта кăларакан полиэтиленпа фольгаран тунă пакетсемпе çеç усă куратпăр, ун чухне савăчĕ те урăхларах пулать, – тет Константин Анатольевич.

Сĕте Элĕк, Елчĕк, Шăмăршă районĕсенчен турттараççĕ. Хамăр патăрти “Корма”, “Звезда” хуçалăхсем те “Молоко Поволжья” пĕрлешĕве сутаççĕ. Хакне те пĕчĕк теме çук: кунта пĕр литрне 15 тенкĕ те 50 пуспа туянаççĕ. Çу хисепне кура тата ÿстереççĕ. Укçипе те вăхăтра (уйăхра икĕ хут) татăлса пыраççĕ.

Предприятинче вăй хуракансем ятарлă форма тăхăнаççĕ. Размерпа килĕшÿллĕн ăна кашнине çĕлеттерсе панă иккен. Сăмах май, пурте Патăрьел райповĕн “Союз” пĕрлешĕвĕнчи ăстасен алли витĕр тухнă.

– Хамăр районти организаци-предприятипе çыхăну тытма тăрăшатпăр. Мĕншĕн-ха укçана юта кăлармалла; Акă, çурт тăррине витрĕмĕр. Хĕç тимĕре Шăнкăртамри “Регион” пĕрлешÿренех турттарса килтĕмĕр. Пирĕнпе тачă çыхăнса ĕçленĕшĕн «ПМК-9» пĕрлешĕве (ертÿçи – С. Ахмеев), «Роспотребнадзор» управленийĕн территори пайне, «Чувашавтодор» пĕрлешĕвĕн Патăрьелĕнчи çул-йĕр тăвакан тата юсакан управленине (ертÿçи В. Рубцов), «Регион» пĕрлешĕве, С. Валеева предпринимателе тав тăватпăр,– пĕлтерчĕ директор.

Хăть хăш ĕçре те йывăрлăхсем пур. К. Углева хатĕр специалистсем вырăнта çукки пăшăрхантарать. Акă, технологра тимлекен В. Наумкина Мордовинчен куçса килнĕ.

– Хама тивĕçтерекен кăтартусене курмасăр кунтан каймастăп, – пĕлтерет Вера Семеновна. Техника çĕм-рĕлсен те юсама Чĕмпĕртенех чĕнме тивет. Ку ыйтусене татса парас тесе Константин Анатольевич çакăнта ĕçлекен çамрăксене лаборант, мастер пĕлĕвне илме вĕрентме яма пуçăнасшăн.

Паян тÿлевсĕр никам та тăрăшмасть. Уйăхри вăтам шалу 13 пин тенкĕрен кая мар. Халь тата организаци шутĕнчен кăнтăрла апат çитерессине йĕркелеме пуçăнаççĕ. Столовăй валли оборудовани илсе килнĕ, вырнаçтарса лартмалли çеç юлнă. Паллă кунсем çитсен е çемьере инкек пулсан хушма кĕмĕл парса хавхалантараççĕ. Пĕрлешÿ пысăк япала туянма е çурт-йĕре çĕнетме шухăшланисене процентсăр кредит та парать.

“Молоко Поволжья” пĕр-лешÿ пуласлăхпа, ĕмĕтпе, шанчăкпа пурăнать. Территорине тасатса тирпейлеме МТЗ–82 трактор туянни, паян-ыран тата хăватлăраххи – Т–150 – килмелли, шыва тасатакан сооруженисем, вентиляцисем вырнаçтарма пуçлани те çакна çирĕплетет. Ял шайĕнче предприяти уçăлни Туçа тăрăхĕнче пурăнакансемшĕн çеç мар, район çыннисемшĕн те, Юхмапа Пăла тăрăхĕн экономикишĕн те лайăх. Тепĕр линине ĕçлеттерсе ярсан коллектива тата 10 çын хутшăнĕ.