Публикации » Туçара – Варнава митрополит

Чăваш Ен тата Шупашкар митрополичĕ Варнава Туçари çветуй Тройцă ячĕллĕ чиркÿре служба ирттерчĕ. Унта пиллĕкмĕш округ благочиннăйĕ Сергий атте тата таврари чиркÿ настоятелĕсем хутшăнчĕç.

Хаклă хăнана район администрацийĕн пуçлăхĕ Н. Глухов кĕтсе илчĕ. Варнава Митрополит Туçана ахальтен килмен: шăпах 20 çул каялла кунта чиркÿ уçăлнă. Малтан вăл йывăçран кăначчĕ, халĕ яла Патăрьел енчен пырса кĕнĕ çĕрте кирпĕчрен тунă çурт мăнаçлăн ларать.

Вырсарни кунхи ирхи кĕлĕ хыççăн çывăх вăхăтрах вырнаçтарма палăртнă куполсене çветит турĕç, унтан пуçтарăннă халăхпа пĕрле хĕреслĕ çула утса тухрĕç.

Служба вĕçленнĕ хыççăн Туçа чиркĕвĕн настоятелĕ Николай протоиерей Варнава митрополита Юхмапа Пăла тăрăхне килнĕшĕн, кĕлĕ ирттернĕшĕн тав турĕ, унăн сывлăхĕшĕн кастарнă праçвере пачĕ. Владыка та Николай атте яваплăха туйса тăрăшнине, кĕлĕ çурчĕн территоринче тирпейлĕх хуçаланнине палăртрĕ.