16 мая 2017 г.
Тутар Сăкăтĕнчи вăтам шкулта тутар хĕрарăмĕсен обществăлла пĕрлешĕвĕн республикăри форумĕ иртрĕ. Калаçу кунта тăван чĕлхене упрасси, унăн йăли-йĕркине тытса пырасси тата аталантарасси çинчен пычĕ.
Мероприятие хутшăнакансем малтанах шкулпа паллашрĕç. Г. Сабитова директор вĕренекенсен, вĕрентекенсен çитĕнĕвĕсем çинче чарăнса тăчĕ. Хăнасене ачасем савăк юрă-ташăпа савăнтарчĕç.
Г. Чемеровапа С. Купкенова наци апат-çимĕçĕ, Р. Абянова, Л. Гайнуллова, Р. Гайнуллина хĕрарăмсен пуçа тăхăнмалли наци калпакне хатĕрлес енĕпе мастер-классем ирттерчĕç.
Ял тăрăхĕнчи тутар хĕрарăмĕ-сен обществăлла пĕрлешĕвĕн председателĕ Ч. Вахитова халиччен тунă ĕç-хĕлпе паллаштарчĕ. Пурте пĕрле презентаци пăхрĕç. Республикăри тутар хĕрарăмĕсен обществăлла пĕрлешĕвĕн председателĕ С. Ишмуратова малашлăх планĕсемпе паллаштарчĕ.
Источник: "Авангард" (газета Батыревского района)