Публикации » Конверт çинчи адрес ДРСУсене Тутар Сăкăтне çитернĕ

12 апреля 2016 г.

Эпир чылай чухне усал ĕçсемпе, преступниксемпе район полицийĕ пĕрремĕш утăм тунине хăнăхнă. Кирлĕ чухне пакунлисем пăтăрмаха кинологсене те явăçтараççĕ, иккĕленỹллисенчен пỹрне йĕрне те илеççĕ... Хальхинче вара çул-йĕре пăхса тăракан ДРСУ работникĕсем хăйсен вăйĕпех акатуй-сабантуй çывăхĕнчи чарăну вырăнне çỹп-çап тăкмалли полигона çавăраканăн ятне-шывне почта конверчĕ çинчи хушаматпа çăмăллăнах тупнă. Тутар Сăкăтĕнче пурăнакан пĕр çемье никамран та ăслăрах пулас тенĕ курăнать. Хайхискерсем кил-тĕрешри мĕн пур ăпăр-тапăра пуçтарнă та остановкăна кайса силленĕ. Кураксен пулăшăвĕ вара çул-йĕре пăхса тăракансене акăш-макăш пулăшнă. Çурса та тăпăлтарса пĕтернĕ çатăрка хутаçра çак ялта пурăнакансем патне тăванĕсем янă çыру конверчĕ пĕрре çеç мар, темиçе те пулнă. Çакă сутнă та тавралăха варалакан апăрша çыннисене. Иртнĕ эрнере вара вĕсен çакăншăн район администраци çумĕнчи адмкомиссире явап тытма тивнĕ.

Источник: "Авангард" (газета Батыревского района)