02 сентября 2015 г.
Тутар Сăкăтĕнче пурăнакан Загит Мингалиевич Салихова ял çыннисем ĕçчен те тỹрĕ чунлă, тăрăшуллă та уçă кăмăллă хуçа пулнипе пĕлеççĕ. Кун-çулăн анлă сукмакĕпе утнă май унăн ĕç кĕнекинче çырăннă çулĕсем те шултăраланнă: тăватă теçеткерен те иртнĕ!
Вун икĕ çулта аслисемпе юнашарах суха пуç тытнă арçын ачан пурнăç шăпи тăван ялĕпех çыхăннă. Вăтам пĕлỹ илнĕ ял каччи ашшĕпе амăшне çăмăлтарах пултăр тесе чăн малтанах Хусана ĕçлеме вырнаçнă. Ун чухнехи яшсене кирек мĕнле пысăк завод-фабрикăна вырнаçма та йывăр пулман. Кăмăл пуррисем вара куçăмсăр майпа пĕлĕвне малалла тăснă.
Загит Мингалиевича вара çар тумне хывнă хыççăн та пысăк хуласенчи çăмăл пурнăç илĕртмен. Ахальтен мар ĕнтĕ вăл 19 çул "Алга" колхозра тĕрлĕрен должноçра тăрăшнă: газ операторĕнче, ферма заведующинче... 1987 çулта ăна ял совет председателĕ пулма шаннă. Каярахпа пĕчĕк предприятинче те хăйĕн çаврăнăçулăхĕпе ăсталăхне кăтартнă, "Шанăç" предприятире 12 çул тăрăшнă тата ытти те. 2005 çулта вара Загит Салихова ял халăхĕ тепĕр хутчен хăйсен пуçлăхĕ _ ял кăлави _ пулма суйланă. Вăл паянхи кунчченех вырăнти самоуправлени органĕнче ял тăрăх специалистĕнче тимлет.
Ялти ятлă-сумлă, хисеплĕ аксакала паян хăйĕн çемйипе пĕрлех çывăх тăванĕсемпе юлташ-пĕлĕшĕсем, пĕрле ĕçлекенсем улттăмĕш теçетке тултарнă ятпа чун-чĕререн саламлĕç. Юбилей кĕрекинче вара унăн пархатарлă кун-çулне те асăнмасăр иртмĕç.
А. Егорова
Источник: "Авангард" (газета Батыревского района)