22 октября 2014 г.
"Чăваш Республикин хальхи вăхăтри культура политикин тĕп тĕллевĕсенчен пĕри вăл _ çынна пултарулăх тĕлĕшĕнчен ỹсме, хăйĕн ăс-хакăлне аталантарма условисемпе майсем туса парасси", _ тенĕччĕ Чăваш Республикин Пуçлăхĕ М. Игнатьев Патшалăх Канашне янă уçă Çырура. Шăпах çакна тĕпе хурса ĕçлеме тăрăшатпăр та ĕнтĕ эпир", _ терĕ пирĕнпе сăмах пуçарса Тутар Сăкăт ялĕнчи культура çурчĕн ертỹçи А. Куликова. Малалла Алсу Шейдулловна Культура çулталăкĕнче ирттерекен мероприятисемпе паллаштарма пуçăнчĕ. Массăллă спорт уявĕ çеç 7-8 тан кая мар пулать-мĕн вĕсен. Февраль уйăхĕнче Р. Куликов воин-интернационалист ячĕпе йĕркелекен турнир Раççей шайнех туха пуçланă. Кĕрешỹçĕсем çĕр-шывăн тĕрлĕ кĕтесĕнчен килеççĕ. Э. Шарафутдинов педагог ячĕпе ирттерекен шашка-шахмат тупăшăвне йышлăн хутшăнаççĕ. Р. Сафиуллов спорт ветеранăн турнирне кăмăллакансен шучĕ ỹссех пырать. З. Гафаров физкультура учительне халаллакан мини-футбол ваттине те, вĕттине те явăçтарать.
С. Хуснетдинова асра тытса ирттерекен "Янра, хут купăс" халăха йышлăн пуçтарать. Хăйсен ăсталăхне сцена çинче кăтартакансем сайралмаççĕ-ха. Ял уявне вара кунта çитĕннĕ кашни çын килсе курма тăрăшать тесен те йăнăш пулмĕ. Мĕн тĕрлĕ конкурс çеç йĕркелемеççĕ. Вĕсене чылайăн явăçаççĕ. Аттракционсене ачасем кăмăллаççĕ.
Мероприяти ирттерессе чылай маларах пĕлтерсе хураççĕ. Наци тумне тăхăннă ачасен ушкăнĕ йыхрава чĕнме урам тăрăхах тухать.
Кăçалтан кашни кас çуллахи вăхăтра концерт лартассине йĕркене кĕртрĕç. Урамри уява курма çулланнă çынсем хаваспах тухаççĕ. Кĕвĕ çеммипе ташша тухакансем те пулаççĕ вара. Çамрăклăха камăн аса илес килмĕ.
Авалтан пыракан йăла-йĕрке уявĕсене малалла тăсса пыни те кăмăллă. Вĕсене ытларах календарьпе çыхăнтарса туса пыраççĕ. Тĕрлĕрен выставка йĕркелеççĕ культура çуртĕнче. Алă ĕç ăстисенне курава япала тăратакансем те йышлă.
"Кĕр пуянлăхĕ" выставкăна темĕн те тăратма пулатех. Килти пахчасенче мĕн кăна çитĕнмест-çке.
Ташă, театр, шашка-шахмат, фитнес, сăвă çырма, юрлама вĕренекенсен кружокĕсене ытларах шкул ачисем çỹреççĕ. Сцена çине тухакан Ф. Валеева, Ф. Абдулахимов, М. Козлов, Р. Махмутова аслă ăрури çынсем ыттисемшĕн тĕслĕх пулса тăраççĕ. Çитĕнекен ăру хушшинче И. Хакимов, А. Незметдинова, И. Хуснетдинова правур. Вĕсемсĕр концерт иртместех.
_ Р. Незметдинова методистпа Р. Хакимова библиотекарь та хăйсен ĕç вырăнĕнчи çынсем пирĕн. Мероприятисене хатĕрленмелле чухне çаннисене тавăрма яланах хатĕр. Культура çуртне халăх утнинче вĕсен тỹпи те пур. Вырăнтисен пултарулăхĕпе йĕркеленĕ кану каçĕсене ытларахăшĕ кăмăлланине пытарма та кирлĕ мар, _ тет Алсу Шейдулловна.
Культура çуртне халăх канма утать паллах. Çавăнпа та кунта бильярд сĕтелĕ те, караоке юрламашкăн кирлĕ музыка инструменчĕсем те, çырăнса илнĕ хаçат-журнал та пур. Мероприятийĕсене вара ỹсĕм çитĕнĕвне кура пуçарса пыни çеç кирлĕ. Çапла тума тăрăшаççĕ те культура ĕçченĕсем.
А. АСТРАХАНЦЕВА
Источник: "Авангард" (газета Батыревского района)