28 мая 2014 г.
Тутар Сăкăтĕнчи вăтам шкулти 11 класри 16 выпускникшăн та майăн 23-мĕшĕ ĕмĕрлĕхе асра юлĕ. Вĕсене телейлĕ кун-çул сунса юлашки шăнкăрав янăрарĕ. Çак ятпа вĕренекенсене пĕлỹ çурчĕн директорĕ Х. Сабитов, Тутар Сăкăт ял тăрăх пуçлăхĕ Н. Хасянов тата ыттисем те саламларĕç. _ Юлашки шăнкăрав _ пуриншĕн те пысăк пĕл-терĕшлĕ уяв. Çулсем иртнĕçем эсир тăван шкул, учительсем, пĕрле вĕрен-нĕ тантăшăрсем пирки ăшăпа аса илетĕр. Халь вара сирĕн ППЭ-сене тытмалла, пурнăç çулĕ çине тăмалла. Тĕрĕслев витĕр ăнăçлă тухма, хăвăра килĕшекен профессие алла илме сунатăп, _ терĕ Р. Кадиров имам-хатиб çутă малашлăх суннă май. Линейкăра вĕренỹре, спортра, обществăлла ĕçре хастаррисене грамотăсем пачĕç.
Сăмах май каласан...
Выпускниксемшĕн юлашки шăнкăрав янăрарĕ пулин те вĕсен халь çанă тавăрсах экзаменсене хатĕрленмелле. Майăн 26-мĕшĕнче 11 класран вĕренсе тухакансем Канашра вырăс литературипе тата географипе (çак предметсене суйласа илнисем) хăйсен пĕлĕвĕсене тĕрĕслерĕç те ĕнтĕ. Иртнĕ çул 361 вĕренекен патшалăхăн пĕрлĕхлĕ экзаменне тытнă. Выпускниксенчен 98 проценчĕ ăна ăнăçлă панă. Химипе Патăрьелĕнчи 1-мĕш вăтам шкулта ăс пухнă И. Муллина 100 бал пухайнă. Çавăн пекех 18 ачан çак предметпах, 16-шĕн вырăс чĕлхипе 90-ран та пысăкрах пулнă.
О. ПАВЛОВА
Источник: "Авангард" (газета Батыревского района)